અમદાવાદ : ગુજરાતના પીએમ મોદીના વડપણ હેઠળ અને શહેરના નરેન્દ્ર મોદી સ્ટેડિયમમાં યોજાનારી સંભવિત ૨૦૩૦ કોમનવેલ્થ ગેમ્સને ધ્યાનમાં રાખીને અમદાવાદ મ્યુનિસિપલ કોર્પોરેશન (AMC) દ્વારા અત્યારથી જ અત્યાધુનિક ઈન્ફ્રાસ્ટ્રક્ચર વિકસાવવાની દિશામાં મોટા પગલાં લેવામાં આવી રહ્યા છે. શહેરના રાણીપ અને આસપાસના વિસ્તારોમાંથી સીધા નરેન્દ્ર મોદી સ્ટેડિયમ સુધીની કનેક્ટિવિટી અત્યંત સરળ અને ઝડપી બનાવવા માટે મ્યુનિસિપલ તંત્ર દ્વારા રાણીપના રાધાસ્વામી રોડથી બકરામંડી થઈને આચર ડેપો સુધી અંદાજે દોઢ કિલોમીટર લાંબો નવો રેલવે ઓવરબ્રિજ (ROB) બનાવવાનો મહત્ત્વનો નિર્ણય લેવામાં આવ્યો છે.

પ્રાપ્ત વિગતો અનુસાર, આ પ્રોજેક્ટ અંતર્ગત એએમસીના એન્જિનિયરિંગ વિભાગ દ્વારા હાલમાં રાધાસ્વામી રોડથી આચર ડેપો સુધીના હાલના રસ્તાને પહોળો કરવાની કામગીરી શરૂ કરી દેવામાં આવી છે. અલગ-અલગ પહોળાઈ ધરાવતા આ માર્ગને હવે એકસરખો ૩૬ મીટર પહોળો બનાવવામાં આવશે, જેના પર જ આ નવો રેલવે ઓવરબ્રિજ ઊભો કરવામાં આવશે. આ ફ્લાઈઓવર અથવા બ્રિજના નિર્માણ માટે રેલવે વિભાગ પાસે મંજૂરી માંગવામાં આવી છે અને સત્તાવાર મંજૂરી મળતાં જ સોઇલ ટેસ્ટિંગ સહિતની પ્રાયમરી કામગીરી યુદ્ધના ધોરણે હાથ ધરવામાં આવશે.

આ નવા બ્રિજની રૂપરેખા અંગે વાત કરીએ તો, ફિઝિબિલિટી સ્ટડી મુજબ રાણીપ તરફ રેલવે લાઇનથી ૨૦૦ થી ૨૫૦ મીટર પહેલાં શરૂ થતો આ વળાંકવાળો બ્રિજ રેલવે ટ્રેકને ઓળંગીને આચર ડેપો પાસેના મુખ્ય રસ્તા પર ઉતરશે. આ ડેપો રોડ ચાર રસ્તાના જંક્શન પર સીધો બીઆરટીએસ (BRTS) કોરિડોર સાથે જોડાઈ જશે, જે વાહનચાલકોને સીધા જ નરેન્દ્ર મોદી સ્ટેડિયમ તરફ જતા રસ્તા સાથે કનેક્ટ કરશે. આ ઉપરાંત બ્રિજની બંને બાજુએ ૬.૫ મીટર પહોળો સર્વિસ રોડ પણ બનાવવામાં આવશે, જેથી સ્થાનિક વાહનવ્યવહારમાં કોઈ અવરોધ ન આવે.

ઉલ્લેખનીય છે કે ગાંધી આશ્રમ ડેવલપમેન્ટ પ્રોજેક્ટ અને સુભાષ બ્રિજ બંધ થવાને કારણે છેલ્લા કેટલાક સમયથી રાણીપ બસ ટર્મિનલ જંક્શન, આરટીઓ સર્કલ અને ૧૩૨ ફૂટ રિંગ રોડ પર ટ્રાફિક જામની સમસ્યા ખૂબ જ વકરી હતી. ચાંદખેડા કે સાબરમતી તરફ જતા નાગરિકોને ભારે ટ્રાફિકનો સામનો કરવો પડતો હતો. આ ગંભીર સમસ્યાને હળવી કરવા માટે તંત્ર દ્વારા ચીમનભાઈ પટેલ આરઓબીને પહોળો કરવાની કામગીરી પણ ચાલી રહી છે, ત્યારે આ નવો રાણીપ-આચર ડેપો આરઓબી ટ્રાફિક સંચાલનમાં ગેમ-ચેન્જર સાબિત થશે.

વિશ્વ કક્ષાની રમતગમત સ્પર્ધાઓની યજમાની માટે સજ્જ થઈ રહેલા અમદાવાદ શહેરમાં આ માળખાકીય વિકાસ કાર્યોથી નાગરિકોને અવરજવરમાં ભારે રાહત મળશે. આગામી સમયમાં આ બ્રિજનું કામ પૂર્ણ થવાથી ઉત્તર અમદાવાદ અને ગાંધીનગર તરફથી સ્ટેડિયમ આવન-જાવન કરતા લાખો ખેલપ્રેમીઓ અને વાહનચાલકોનો સમય બચશે તેમજ શહેરી વિકાસમાં વધુ એક સીમાચિહ્ન ઉમેરાશે.