અમદાવાદ તા.૨૦ :  ભગવાન જગન્નાથની વિશ્વવિખ્યાત અષાઢી બીજની રથયાત્રા 2026 ને હવે ગણતરીના દિવસો બાકી છે. ત્યારે જમાલપુર સ્થિત જગન્નાથ મંદિર ખાતે રથયાત્રાની તૈયારીઓ પૂરજોશમાં ચાલી રહી છે. મંદિરના મહંત દિલીપદાસજીએ કળશયાત્રા અને રથોના સમારકામ અંગે વિગતવાર માહિતી આપી છે.

મહંત દિલીપદાસજીએ જણાવ્યું કે ભગવાન જગન્નાથ, બલભદ્રજી અને સુભદ્રાજીના ત્રણેય રથોની રંગાઈ-કામગીરી અંતિમ તબક્કામાં છે. દર વર્ષની પરંપરા મુજબ આ વર્ષે પણ નવા લાકડાં, દોરડાં અને કાપડ વડે રથોનું સમારકામ કરવામાં આવી રહ્યું છે. રથોને આકર્ષક રંગો અને સજાવટથી શણગારવામાં આવશે જેથી રથયાત્રા વધુ દિવ્ય લાગે.

કળશયાત્રા અંગે મહંતશ્રીએ જણાવ્યું કે રથયાત્રાના એક દિવસ અગાઉ ભવ્ય કળશયાત્રાનું આયોજન કરવામાં આવશે. આ વર્ષે 108 કળશો સાથે સૌભાગ્યવતી મહિલાઓ દ્વારા કળશયાત્રા કાઢવામાં આવશે. આ કળશોમાં ભરેલું પવિત્ર જળ રથયાત્રાના દિવસે ભગવાનને સ્નાન માટે વાપરવામાં આવશે. આ પરંપરા વર્ષોથી અખંડ ચાલી રહી છે.

મહંત દિલીપદાસજીએ ભક્તોને અપીલ કરી કે રથયાત્રા એ માત્ર ઉત્સવ નથી, પરંતુ શ્રદ્ધા અને એકતાનું પ્રતીક છે. તેમણે જણાવ્યું કે આ વર્ષે પણ પરંપરા મુજબ જ તમામ વિધિઓ પૂર્ણ શ્રદ્ધા અને ભક્તિભાવ સાથે કરવામાં આવશે. વહીવટી તંત્ર સાથે સંકલન કરીને ભક્તોની સુવિધા અને સુરક્ષા માટે તમામ વ્યવસ્થાઓ ગોઠવવામાં આવી રહી છે.

રથયાત્રામાં દેશ-વિદેશથી લાખો ભક્તો ઉમટી પડે છે. તંત્ર દ્વારા રૂટ પર સીસીટીવી, પોલીસ બંદોબસ્ત, તબીબી કેમ્પ અને પીવાના પાણીની વ્યવસ્થા કરવામાં આવી રહી છે. મંદિર પરિસરમાં પણ દર્શન માટેની વ્યવસ્થા સુચારુ બનાવવામાં આવી છે.