વડોદરા:મહાનગરપાલિકાની સ્થાયી સમિતિએ પૂર્વ ક્રિકેટર યુસુફ પઠાણને ૯૭૮ ચોરસ મીટરનો વિવાદિત પ્લોટ ફાળવવાની દરખાસ્ત સર્વાનુમતે મંજૂર કરી છે. બેઠક પહેલાં કોંગ્રેસના આગેવાનોએ બેનરો સાથે ધરણાં કરીને જાહેર જમીનની ફાળવણીનો વિરોધ કર્યો હતો.

મંજૂર દરખાસ્ત મુજબ ૫૦૦ ચોરસ મીટર જમીન ભેટરૂપે તથા બાકીની ૪૭૮ ચોરસ મીટર જમીન નિર્ધારિત મૂલ્યાંકનના ૫૫ ટકા દરે આપવાની છે. એટલે સમગ્ર પ્લોટ મફત અપાયો હોવાનું કહેવું યોગ્ય નથી. અગાઉ હરાજી માટે જમીનનું અંદાજિત મૂલ્યાંકન રૂ. ૨૦.૫ કરોડ કરાયું હતું. સ્થાયી સમિતિના અધ્યક્ષે રાજ્ય સરકારના ઠરાવના આધારે મંજૂરી અપાયાનું જણાવ્યું. આ જ જમીન અંગે અગાઉ દબાણની નોટિસ અને હાઇકોર્ટમાં કાર્યવાહી પણ થઈ ચૂકી છે.