આણંદ: ગુજરાતના વિખ્યાત એજ્યુકેશન હબ ગણાતા વલ્લભ વિદ્યાનગરની પવિત્રતાને લાંછન લગાડતી એક ચોંકાવનારી ઘટના સામે આવી છે. સરદાર પટેલ યુનિવર્સિટીના ગેટ પાસે જ આવેલા ‘રોઝ ફેમિલી સ્પા’માં સ્પાની આડમાં ચાલી રહેલા દેહવિક્રયના કાળા કારોબારનો આણંદ એસઓજી પોલીસે પર્દાફાશ કર્યો છે. પોલીસે બાતમીના આધારે ઓચિંતો દરોડો પાડી વિદેશી યુવતીઓ સહિત કુલ 10 લલનાઓ અને એક ગ્રાહક યુવકને વાંધાજનક હાલતમાં ઝડપી પાડ્યા છે.
યુનિવર્સિટીના નાકની નીચે જ ચાલતો અડ્ડો
સૌથી વધુ આશ્ચર્યની વાત એ છે કે આ સ્પા સેન્ટર યુનિવર્સિટીથી માત્ર 100 મીટરના અંતરે આવેલું હતું. જ્યાં હજારો વિદ્યાર્થીઓ શિક્ષણ મેળવવા આવે છે, ત્યાં જ સ્પાના નામે ગેરકાયદેસર પ્રવૃત્તિઓ ધમધમી રહી હતી. પોલીસને ચોક્કસ માહિતી મળી હતી કે અહીં ‘ફેમિલી સ્પા’ના બોર્ડ હેઠળ વિદેશી યુવતીઓ દ્વારા અનૈતિક કામ કરવામાં આવે છે. શનિવારે સાંજે જ્યારે પોલીસે દરોડો પાડ્યો ત્યારે સમગ્ર વિસ્તારમાં દોડધામ મચી ગઈ હતી.
વિદેશી યુવતીઓ અને વિઝાની તપાસ
ઝડપાયેલી યુવતીઓમાં કેટલીક વિદેશી લલનાઓ પણ સામેલ છે. પોલીસ હવે એ તપાસ કરી રહી છે કે આ યુવતીઓ કયા દેશની છે અને તેમની પાસે ભારતમાં રહેવા માટેના માન્ય વિઝા છે કે નહીં. ઘણીવાર ટૂરિસ્ટ વિઝા પર આવીને આવી અનૈતિક પ્રવૃત્તિઓ કરવામાં આવતી હોય છે, જેના મૂળિયાં ક્યાં સુધી ફેલાયેલા છે તેની તપાસ એસઓજી દ્વારા કરવામાં આવી રહી છે.
સ્થાનિકોમાં રોષ અને અન્ય સેન્ટરોમાં ફફડાટ
વિદ્યાનગર જેવા શાંત અને શૈક્ષણિક વિસ્તારમાં આવા ગંદા વ્યવસાયનો ખુલાસો થતાં સ્થાનિક રહીશો અને વાલીઓમાં ભારે રોષ જોવા મળી રહ્યો છે. પોલીસની આ આકરી કાર્યવાહીને પગલે આણંદ અને વિદ્યાનગરમાં ચાલતા અન્ય શંકાસ્પદ સ્પા સેન્ટરોના સંચાલકોમાં ફફડાટ વ્યાપી ગયો છે. પોલીસે સ્પાના સંચાલકો વિરુદ્ધ કડક કાયદેસરની કાર્યવાહી હાથ ધરી છે અને આ નેટવર્ક પાછળના મુખ્ય સૂત્રધારોને પકડવા ચક્રો ગતિમાન કર્યા છે.
શિક્ષણના ધામમાં આ રીતે ‘પાપનો ઘડો’ ફૂટતા હવે પોલીસ આગામી દિવસોમાં વધુ કડક ચેકિંગ ઝુંબેશ ચલાવે તેવી શક્યતા છે.