અમદાવાદ તા.૨૭ : અમદાવાદના કાલુપુર વિસ્તારમાં વિશ્વાસઘાતની ચોંકાવનારી ઘટના સામે આવી છે. કાલુપુરમાં આવેલી જાણીતી સંદિપ જ્વેલર્સમાંથી લાખો રૂપિયાનું સોનું ચોરી થયું છે.

પ્રાથમિક માહિતી મુજબ, પશ્ચિમ બંગાળનો વતની વિશ્વનાથ ઉર્ફે વિસુ સામંતા સંદિપ જ્વેલર્સમાં કારીગર તરીકે કામ કરતો હતો. બનાવના દિવસે તે દુકાનમાંથી નીચે ચા-પાણી પીવા જવાનું કહીને બહાર નીકળ્યો અને પછી પરત ફર્યો જ નહીં.

લાંબો સમય સુધી પરત ન ફરતા માલિકને શંકા ગઈ અને દુકાનમાં તપાસ કરતા ચોરી સામે આવી. તપાસમાં 38 ગ્રામ વજનની સોનાની બંગડી જેની કિંમત ₹5.60 લાખ છે અને 14 ગ્રામ સોનાનો ભૂકો જેની કિંમત ₹1.95 લાખ છે, એમ કુલ ₹7.56 લાખનું સોનું ગાયબ હતું.

દુકાનના માલિકે તાત્કાલિક કાલુપુર પોલીસ સ્ટેશનમાં વિશ્વનાથ સામે ફરિયાદ નોંધાવી છે. હાલ પોલીસ CCTV ફૂટેજના આધારે આરોપીની શોધખોળ કરી રહી છે.