વાવ : વાવ-થરાદ વિસ્તારના ગ્રામીણ વિસ્તારોમાં સર્વાંગી વિકાસને વેગ આપવા અને પાયાની પ્રાથમિક સુવિધાઓ સમયસર પૂરી પાડવાના ઉદ્દેશ્યથી સ્થાનિક સરપંચો દ્વારા એક મહત્વપૂર્ણ વહીવટી રજૂઆત કરવામાં આવી છે. ૧૬મા નાણા પંચની ગ્રાન્ટના યોગ્ય ઉપયોગ અને વહીવટી પ્રક્રિયાઓને વધુ સરળ બનાવવાના હેતુથી વાવ-થરાદ વિસ્તારના સરપંચોએ જિલ્લા વિકાસ અધિકારી (DDO)ને આવેદનપત્ર પાઠવ્યું છે. ગામડાઓની વાસ્તવિક જરૂરિયાતો અને સ્થાનિક પરિસ્થિતિઓને ધ્યાનમાં રાખીને ગ્રાન્ટના ખર્ચ માટે ગ્રામ પંચાયતોને નાણાકીય તેમજ વહીવટી સ્વતંત્રતા આપવામાં આવે તેવી મુખ્ય માગણી આ આવેદનપત્રમાં કરવામાં આવી છે.

હાલમાં ૧૬મા નાણા પંચની ગ્રાન્ટનો ઉપયોગ કરતી વખતે ગ્રામ પંચાયતોને અનેક વ્યવહારુ મુશ્કેલીઓનો સામનો કરવો પડી રહ્યો છે. આ આવેદનપત્રમાં ખાસ કરીને Untied ગ્રાન્ટમાંથી ગામના રસ્તા, પેવર બ્લોક અને અન્ય પ્રાથમિક સુવિધાઓ માટે નક્કી કરાયેલી ૨૦%ની મર્યાદાને કાં તો વધારવા અથવા તદ્દન નાબૂદ કરવાની જોરદાર માગ કરાઈ છે. આ ઉપરાંત, ગામના આંતરિક સીસી રોડ, રસ્તાનું સમારકામ તેમજ પાણી પુરવઠા કે ડ્રેનેજની કામગીરી દરમિયાન ક્ષતિગ્રસ્ત થયેલા રસ્તાઓના રીપેરિંગ માટે નાણા પંચની ગ્રાન્ટ વાપરી શકાય તેવી સ્પષ્ટ અને સત્તાવાર જોગવાઈ કરવાની બાબત પર ભાર મૂકવામાં આવ્યો છે.

પ્રિ-ઓડિટના ૧૯ દસ્તાવેજો અને જટિલ પ્રક્રિયાઓ સામે ભારે અસંતોષ

બીજી તરફ, તાલુકા કક્ષાએ બાંધકામના બિલ રજૂ કરતી વખતે થતી પ્રિ-ઓડિટની જટિલ પ્રક્રિયા સામે પણ સરપંચોએ ભારે અસંતોષ વ્યક્ત કર્યો છે. હાલમાં પ્રિ-ઓડિટ માટે ૧૯ જેટલા સાધનિક કાગળો માગવામાં આવે છે, જેમાં રૂ. ૧૦૦ના સ્ટેમ્પનું પ્રમાણપત્ર, રૂ. ૩૦૦ના સ્ટેમ્પ પરનું કરારનામું, સિમેન્ટ કન્ઝમ્પશન સ્ટેટમેન્ટ અને વિવિધ GST કે SD કપાતના પુનરાવર્તિત દસ્તાવેજોનો સમાવેશ થાય છે. સરપંચોનું કહેવું છે કે વાવ-થરાદ વિસ્તારમાં માગવામાં આવતા આ અતિશય દસ્તાવેજો રાજ્યના અન્ય જિલ્લાઓમાં માગવામાં આવતા નથી, તેથી સમગ્ર રાજ્યમાં એકસમાન અને સરળ વહીવટી પ્રક્રિયા અમલી બનાવવી અત્યંત જરૂરી છે.

ગામડાં કક્ષાએ થતા વિકાસકામો ઝડપથી પૂર્ણ થાય તે માટે ટેન્ડર પ્રક્રિયાને સરળ બનાવી વહીવટી મંજૂરીઓ ઝડપથી આપવાની વિનંતી કરાઈ છે. GPDP (ગામ પંચાયત વિકાસ યોજના) અંતર્ગત સ્થાનિક જરૂરિયાતો મુજબના કામો પસંદ કરવા માટે ગ્રામ પંચાયતોને વધુ આર્થિક નિર્ણયશક્તિ આપવાની પણ માગ કરવામાં આવી છે. આવા સુધારાત્મક પગલાં લેવાથી ગ્રામ પંચાયતો પરનું વહીવટી ભારણ ઘટશે અને બિલો મંજૂર થવામાં થતો બિનજરૂરી વિલંબ દૂર થશે.