નડિયાદ : ખેડા જિલ્લાના ઠાસરા તાલુકામાં આવેલ ઓઝરાળા ગામમાં સરકારી ફરજ બજાવવા ગયેલા બે કર્મચારીઓ સાથે અત્યંત શરમજનક અને ચકચારજનક અનાચારનો બનાવ સામે આવ્યો છે. ૨૪ ઓક્ટોબરના રોજ ઓઝરાળા ગામમાં ખેતીના પાક સર્વેની સત્તાવાર કામગીરી માટે ગયેલા બે કર્મચારીઓને ગામના સરપંચ અને તેમના સાગરીતે કથિત રીતે ગ્રામ પંચાયત કચેરી ખાતે બંધક બનાવી, દોરડાથી બાંધીને ઢોર માર માર્યો હતો. આ ચોંકાવનારી ઘટના અંગે પંચાયત કચેરીમાં તાલિબાની સજા આપવા, જાનથી મારી નાખવાની ધમકી આપવા તેમજ મોબાઈલ તોડી નાખવા બદલ ઠાસરા પોલીસ મથકે સત્તાવાર ફરિયાદ નોંધાવવામાં આવી છે.

મળતી વિગતો અનુસાર, સરકારી કચેરી દ્વારા સોંપાયેલી પાક સર્વેની કામગીરી અર્થે બંને સરકારી કર્મચારીઓ ઓઝરાળા ગામની મુલાકાતે પહોંચ્યા હતા. તે દરમિયાન ઓઝરાળા ગામના સરપંચ જયદીપ પટેલ અને સાગર પટેલ નામના શખ્સે તેઓ સાથે ઉગ્ર બોલાચાલી શરૂ કરી હતી. ત્યારબાદ કર્મચારીઓને બળજબરીપૂર્વક ગ્રામ પંચાયત કચેરીની અંદર લઈ જઈને દરવાજો બંધ કરી દેવામાં આવ્યો હતો અને કર્મચારીઓને દોરડાથી બાંધીને ગંભીર શારીરિક માર મારવામાં આવ્યો હતો.

આ હુમલા દરમિયાન સરપંચ અને તેમના સાગરીતે સરકારી કર્મચારીઓ સાથે અત્યંત અસભ્ય વર્તન કરી ગાળાગાળી કરી હતી. ઘટનાને વધુ ઉગ્ર બનાવતા કર્મચારીનો આશરે રૂ. ૨૪,૦૦૦ની કિંમતનો કિંમતી મોબાઈલ ફોન છીનવીને બહાર આવેલી ગટરમાં ફેંકી દઈને તોડી નાખવામાં આવ્યો હતો. કર્મચારીઓને જો આ અંગે કોઈને જાણ કરવામાં આવશે તો જાનથી મારી નાખવાની ધમકી પણ આપવામાં આવી હતી.

આ સમગ્ર ઘટના બાદ ભયભીત થયેલા અને ઈજાગ્રસ્ત બનેલા સરકારી કર્મચારીઓએ તાત્કાલિક ઉચ્ચ અધિકારીઓને સમગ્ર આપવીતી જણાવી હતી. ત્યારબાદ બંને કર્મચારીઓ ઠાસરા પોલીસ સ્ટેશને પહોંચ્યા હતા અને સરપંચ જયદીપ પટેલ તેમજ સાગર પટેલ સામે સરકારી કામગીરીમાં રુકાવટ કરવા, ગેરકાયદેસર રીતે બંધક બનાવી માર મારવા અને મિલકતને નુકસાન પહોંચાડવા સહિતની વિવિધ કલમો હેઠળ લેખિત ફરિયાદ નોંધાવી હતી.

સરકારી કર્મચારીઓ પર પંચાયત કચેરીમાં જ થયેલા આ કથિત હુમલાને પગલે જિલ્લાના સમગ્ર સરકારી વહીવટી આલમ અને મહેસૂલી કર્મચારીઓમાં ભારે આક્રોશ વ્યાપી ગયો છે. સરકારી ફરજ દરમિયાન કર્મચારીઓની સુરક્ષા સામે ગંભીર પ્રશ્નાર્થ ચિહ્ન ઊભો થતાં વિવિધ કર્મચારી મંડળોએ આરોપીઓ સામે કડકમાં કડક કાયદાકીય પગલાં ભરવા માંગ કરી છે.

ઠાસરા પોલીસ મથકના અધિકારીઓએ આ મામલે ગુનો નોંધીને પ્રાથમિક તપાસ હાથ ધરી છે. પોલીસે જણાવ્યું હતું કે, કથિત આક્ષેપો અંગે તમામ પાસાઓની ઊંડાણપૂર્વક તપાસ ચાલી રહી છે અને ઘટનાસ્થળ તેમજ આસપાસના પુરાવાઓ એકત્ર કરવામાં આવી રહ્યા છે. તપાસ પૂર્ણ થયા બાદ દોષિતો સામે કાયદાનુસારની કડક કાર્યવાહી કરવામાં આવશે.