અમદાવાદ :ગુજરાતમાં રાઈટ ટુ એજ્યુકેશન (RTE) હેઠળ અપાતી વિદ્યાર્થી દીઠ સહાયમાં વધારો કરવા માટે સ્વનિર્ભર શાળા સંચાલક મહામંડળ દ્વારા મુખ્યમંત્રી અને શિક્ષણમંત્રીને રજૂઆત કરવામાં આવી છે. હાલની રૂ. 13,675ની સહાય અપૂરતી હોવાના દાવા સાથે નવી ગણતરી કરવાની માંગ ઉઠી છે.

આર્થિક કટોકટી: હાલની ઓછી સહાય અને રાજ્યના 11 જિલ્લાઓમાં હજુ સુધી ચૂકવણી બાકી હોવાને કારણે ખાનગી શાળાઓને શિક્ષકોના પગાર ચૂકવવામાં મોટી મુશ્કેલી પડી રહી છે.

 હાઇકોર્ટના માર્ગદર્શન મુજબ FRC દ્વારા નક્કી કરાયેલી ફી અથવા સરકારનો વિદ્યાર્થી દીઠ વાસ્તવિક ખર્ચ ચૂકવવાની માંગ કરવામાં આવી છે.

આર્થિક રીતે સક્ષમ લોકો ખોટા દસ્તાવેજોના આધારે લાભ લેતા હોવાના આક્ષેપ સાથે, પ્રવેશ પ્રક્રિયા પારદર્શક બનાવવા કડક SOP લાગુ કરવા વિનંતી કરાઈ છે.

 જિલ્લા શિક્ષણ અધિકારીના જણાવ્યા મુજબ, ખોટા એડમિશન અંગે રજૂઆત મળ્યે કડક કાર્યવાહી કરવામાં આવશે અને ફી વધારા અંગેની માંગ રાજ્ય સરકાર સુધી પહોંચાડવામાં આવી છે.