બનાસકાંઠાના દિયોદર તાલુકાના વડાણા ગામ નજીક એક હૃદયદ્રાવક અને ગંભીર અકસ્માત સર્જાયો છે. અહીં એક પૂરપાટ ઝડપે આવી રહેલી અર્ટિગા ગાડીએ બાઈકને જોરદાર ટક્કર મારતાં ગમખ્વાર અકસ્માત નડ્યો હતો. આ દુર્ઘટનામાં બાઈક પર સવાર પિતા અને પુત્રનું ઘટનાસ્થળે જ કમકમાટીભર્યું મોત નીપજ્યું છે, જ્યારે બાઈક પર સવાર માતાને ગંભીર ઈજાઓ પહોંચતા હાલ તેઓ હોસ્પિટલમાં સારવાર હેઠળ છે. મૃતક પિતા-પુત્ર ભાભર તાલુકાના રહેવાસી હોવાનું સામે આવ્યું છે. અકસ્માત સર્જ્યા બાદ ગાડી ચાલક વાહન મૂકીને ઘટનાસ્થળેથી ફરાર થઈ ગયો છે. આ મામલે દિયોદર પોલીસે તાત્કાલિક ઘટનાસ્થળે પહોંચીને ગુનો નોંધી આગળની તપાસ અને ફરાર ચાલકને પકડવાના ચક્રો ગતિમાન કર્યા છે.