નડિયાદ:  ખેડા જિલ્લાના મુખ્ય મથક નડિયાદમાં સરકાર સંચાલિત ‘સખી વન સ્ટોપ સેન્ટર’ વિવાદના ઘેરામાં આવ્યું છે. મુશ્કેલીમાં મુકાયેલી મહિલાઓને આશ્રય અને સુરક્ષા આપવા માટે કાર્યરત આ સેન્ટરમાં ધર્માંતરણની પ્રવૃત્તિઓ ચાલતી હોવાના ગંભીર આક્ષેપો હિન્દુ સંગઠનો દ્વારા કરવામાં આવ્યા છે. આ મામલે રવિવારે ભારે હોબાળો થયો હતો, જેના પગલે વહીવટી તંત્ર અને પોલીસ દોડતું થયું છે.

બ્રેઈનવોશ કરીને ધર્મ બદલવા મજબૂર કરાતી હોવાનો દાવો 

હિન્દુ સંગઠનોના કાર્યકરોને બાતમી મળી હતી કે સખી વન સ્ટોપ સેન્ટરમાં આશ્રય લેનારી હિન્દુ મહિલાઓને ખ્રિસ્તી ધર્મની પ્રાર્થના કરવા અને ધર્મ પરિવર્તન કરવા માટે માનસિક રીતે દબાણ કરવામાં આવે છે. આક્ષેપ છે કે સેન્ટરના જવાબદાર હોદ્દેદારો મહિલાઓને લાલચ આપી અથવા ડર બતાવી તેમનું બ્રેઈનવોશ કરી રહ્યા છે. આ માહિતી મળતા જ મોટી સંખ્યામાં હિન્દુ સંગઠનોના પ્રતિનિધિઓ સેન્ટર પર પહોંચ્યા હતા અને સૂત્રોચ્ચાર કરીને હોબાળો મચાવ્યો હતો.

કલેક્ટર અને વહીવટી તંત્રની ભૂમિકા 

આ વિવાદ વધુ વકરતા મામલો ખેડા કલેક્ટર સુધી પહોંચ્યો હતો. કલેક્ટરના આદેશ બાદ નડિયાદના પ્રાંત અધિકારી અને સ્થાનિક પોલીસનો ઉચ્ચ કાફલો તપાસ માટે સખી વન સ્ટોપ સેન્ટર પર પહોંચ્યો હતો. અધિકારીઓએ ત્યાં હાજર મહિલાઓના નિવેદનો લેવાની અને રેકોર્ડ તપાસવાની કામગીરી શરૂ કરી છે. સૂત્રોના જણાવ્યા અનુસાર, સેન્ટરના એડમિનિસ્ટ્રેટરની ભૂમિકા અંગે પણ ઝીણવટભરી તપાસ કરવામાં આવી રહી છે કે શું તેમની જાણકારી હેઠળ જ આ બધું ચાલી રહ્યું હતું કે કેમ.

સમાજમાં રોષ અને નિષ્પક્ષ તપાસની માંગ 

સરકારી સંસ્થામાં જ જો ધર્માંતરણ જેવી ગતિવિધિઓ થતી હોય તો તે અત્યંત ગંભીર બાબત હોવાનું સ્થાનિકો માની રહ્યા છે. હિન્દુ સંગઠનોએ સ્પષ્ટ ચીમકી આપી છે કે જો આ મામલે જવાબદારો સામે કડક કાર્યવાહી કરવામાં નહીં આવે અને સત્ય બહાર લાવવામાં નહીં આવે તો તેઓ ઉગ્ર આંદોલન કરશે. હાલમાં સેન્ટરની આસપાસ પોલીસ બંદોબસ્ત ગોઠવી દેવામાં આવ્યો છે અને તપાસનો ધમધમાટ તેજ કરવામાં આવ્યો છે. વહીવટી તંત્ર દ્વારા આ મામલે ટૂંક સમયમાં સત્તાવાર ખુલાસો કરવામાં આવે તેવી શક્યતા છે.