અમદાવાદ : મોબાઈલ ગેમની લત કેટલી ખતરનાક હદે પહોંચી શકે છે તેનો ચોંકાવનારો કિસ્સો અમદાવાદમાં સામે આવ્યો છે. શહેરના પાલડી વિસ્તારમાં રહેતો ધોરણ-9 માં અભ્યાસ કરતો 14 વર્ષનો કિશોર મોબાઈલ ગેમની લતે ચડી જતા છેલ્લા એક મહિનાથી સ્કૂલે જવાને બદલે આખો દિવસ બગીચામાં બેસી ગેમ રમતો હોવાનું બહાર આવ્યું છે.

પ્રાપ્ત વિગતો મુજબ, કિશોર રોજ સવારે નિયમિત સમયે સ્કૂલ ડ્રેસ પહેરીને, દફતર અને ટિફિન લઈને ઘરેથી નીકળતો હતો. પરિવારજનોને એમ હતું કે દીકરો સ્કૂલે જાય છે. પરંતુ તે સ્કૂલે જવાને બદલે નજીકના લો ગાર્ડનમાં જતો રહેતો અને સ્કૂલ છૂટવાના સમય સુધી આખો દિવસ મોબાઈલમાં ઓનલાઈન ગેમ રમતો હતો. બપોરે ટિફિન પણ બગીચાના બાંકડે બેસીને જ ખાઈ લેતો હતો.

આખો મહિનો કિશોર સતત ગેરહાજર રહેતા શાળા દ્વારા તેના વાલીને મેસેજ અને ફોન કરવામાં આવ્યા. શરૂઆતમાં કિશોરે વાલીને 'સ્કૂલમાં નેટવર્ક પ્રોબ્લેમ હશે' કહી ગેરમાર્ગે દોર્યા. પરંતુ શાળાના આચાર્યએ વાલીને રૂબરૂ બોલાવતા સમગ્ર ભાંડો ફૂટ્યો હતો. 

વાલીઓએ કિશોરની પૂછપરછ કરતા તેણે કબૂલ્યું કે તેને એક ઓનલાઈન મલ્ટિપ્લેયર ગેમની એટલી લત લાગી ગઈ હતી કે સ્કૂલમાં મન ન લાગતું અને આખો દિવસ ગેમ રમવાનું મન થતું હતું. ગેમમાં નવા લેવલ અને રિવોર્ડ મેળવવા માટે તે સ્કૂલ બંક કરીને બગીચામાં જતો રહેતો.

કિશોરના પિતાએ જણાવ્યું કે, "અમને સપનેય ખ્યાલ નહોતો. દીકરો રોજ સમયસર નીકળતો અને સમયસર ઘરે આવતો. અમને લાગતું કે ભણે છે. આ ઘટનાએ અમને હચમચાવી દીધા છે." હાલ વાલીઓએ કિશોરનો મોબાઈલ લઈ લીધો છે અને તેને કાઉન્સેલિંગ માટે મનોચિકિત્સક પાસે લઈ જવામાં આવ્યો છે.

મનોચિકિત્સકના જણાવ્યા મુજબ, "ઓનલાઈન ગેમનું વળગણ ડ્રગ્સના વ્યસન જેવું જ જોખમી છે. બાળકોમાં ચીડિયાપણું, અભ્યાસમાં અરુચિ, ખોટું બોલવું અને સામાજિક રીતે અલગ પડી જવું તેના મુખ્ય લક્ષણો છે. વાલીઓએ બાળકોના મોબાઈલ વપરાશ પર ધ્યાન રાખવું અને તેમની સાથે વધુ સમય વિતાવવો જરૂરી છે."