સુરત તા.૨૦ : દક્ષિણ ગુજરાતના સુરત અને તાપી જિલ્લામાં દૂધ વિતરણ કરતી સુમુલ ડેરીએ આજે 20 મે 2026થી દૂધ અને છાશના વેચાણ ભાવમાં વધારો કરવાની જાહેરાત કરી છે. ડેરી દ્વારા પ્રતિ લીટર 2 રૂપિયાનો વધારો ઝીંકવામાં આવતા લાખો ગ્રાહકોના ખિસ્સા પર સીધી અસર પડશે.

 

સુમુલ ડેરીના ચેરમેને જણાવ્યું હતું કે પશુપાલકોને પોષણક્ષમ ભાવ મળી રહે અને દૂધ ઉત્પાદન ખર્ચ, પશુ આહાર, પરિવહન અને પેકેજિંગ ખર્ચમાં સતત વધારો થઈ રહ્યો હોવાથી ડેરીને ભાવ વધારાનો નિર્ણય લેવાની ફરજ પડી છે. નવા ભાવ આજથી એટલે કે 20 મેથી જ લાગુ પડશે.

 

 

 

 

નવા ભાવ શું છે?

 

 

ભાવ વધારા બાદ સુમુલના વિવિધ પ્રોડક્ટના નવા ભાવ નીચે મુજબ રહેશે:

**પ્રોડક્ટ** **જૂનો ભાવ** **નવો ભાવ** **વધારો**

સુમુલ ગોલ્ડ - 1 લીટર ₹66 ₹68 ₹2

સુમુલ શક્તિ - 1 લીટર ₹62 ₹64 ₹2

સુમુલ તાજા - 1 લીટર ₹56 ₹58 ₹2

સુમુલ સ્લિમ - 1 લીટર ₹52 ₹54 ₹2

સુમુલ છાશ - 500 મિ.લિ ₹15 ₹16 ₹1

*ગૃહિણીઓમાં નારાજગી*  

ભાવ વધારાની જાહેરાત થતા જ સુરત અને તાપી જિલ્લાની ગૃહિણીઓમાં નારાજગી જોવા મળી રહી છે. રોજિંદા વપરાશની વસ્તુઓમાં દૂધ અને છાશ મહત્વની ચીજ છે. પ્રતિ લીટર 2 રૂપિયાના વધારાથી માસિક બજેટ પર સીધી અસર પડશે. ઉનાળાની સિઝનમાં છાશની માંગ વધુ રહેતી હોવાથી છાશના ભાવમાં 1 રૂપિયાનો વધારો પણ ગ્રાહકોને મોંઘો પડશે.

 

સુમુલ ડેરી સાથે સંકળાયેલા 2.5 લાખથી વધુ પશુપાલકોને આ ભાવ વધારાનો સીધો ફાયદો મળશે. ડેરી દ્વારા દૂધ ખરીદ ભાવમાં પણ વધારો કરવામાં આવ્યો છે.

 

ઉલ્લેખનીય છે કે અગાઉ અમૂલ અને મધર ડેરીએ પણ દૂધના ભાવમાં વધારો કર્યો હતો. હવે સુમુલ ડેરીના નિર્ણય બાદ રાજ્યની અન્ય સહકારી ડેરીઓ પણ ભાવ વધારો કરે તેવી શક્યતા છે.