શામળાજી : અરવલ્લી જિલ્લાના સુપ્રસિદ્ધ અને પવિત્ર યાત્રાધામ શામળાજી ખાતે જન્માષ્ટમી પર્વની અતિ ભવ્ય, શ્રદ્ધામય અને ઉત્સાહભેર ઉજવણી કરવામાં આવી રહી છે. જગતના નાથ ભગવાન શામળિયા સેટના દર્શન કરવા માટે વહેલી સવારથી જ ગુજરાત અને બહારના રાજ્યોમાંથી હજારોની સંખ્યામાં શ્રદ્ધાળુઓનું મહેરામણ ઉમટી પડ્યું છે. સમગ્ર શામળાજી ધામ 'જય રણછોડ, માખણ ચોર' અને 'જય શામળિયા'ના ગગનભેદી જયઘોષથી ગૂંજી ઊઠ્યું છે.

મનોરમ શૃંગાર અને ખાસ પૂજા-અર્ચના:

મંદિર ટ્રસ્ટ દ્વારા જન્માષ્ટમીના પવિત્ર અવસર પર ભગવાન શામળિયાજીને ખાસ દિવ્ય વસ્ત્રો અને આભૂષણોથી સજ્જ કરવામાં આવ્યા છે. વહેલી સવારથી જ મંગળા આરતી સાથે વિશેષ મહાપૂજા, વિષ્ણુ સહસ્રનામ પાઠ અને સેવાનો સુંદર કાર્યક્રમ યોજાયો છે. ભક્તો નંદલાલાના આ મનોહર રૂપના દર્શન કરીને ધન્યતાની લાગણી અનુભવી રહ્યા છે.

મધરાત્રિએ થશે કૃષ્ણ જન્મોત્સવના વધામણાં:

જેમ જેમ સાંજ ઢળતી જાય છે તેમ તેમ શ્રદ્ધાળુઓનો ઉત્સાહ બેવડાઈ રહ્યો છે. હવે સાક્ષાત ગોકુળ સમાન બનેલા શામળાજી મંદિરમાં મધરાત્રિએ બરાબર ૧૨:૦૦ ના ટકોરે કાળિયા ઠાકોરના જન્મના અલૌકિક વધામણાં કરવામાં આવશે. મધ્યરાત્રિએ શંખનાદ, ઢોલ-નગારા અને મહાઆરતી સાથે કન્હૈયાના જન્મોત્સવની ઉજવણી કરાશે, જેને માટે મંદિર પરિસરમાં ચુસ્ત સુરક્ષા અને ભક્તો માટે સુચારુ દર્શન વ્યવસ્થા ગોઠવવામાં આવી છે.