વડોદરા : સમાજમાં એક તરફ વિજ્ઞાન અને ટેકનોલોજીનો વ્યાપ વધી રહ્યો છે, ત્યારે બીજી તરફ દીકરાની જન્મની ઘેલછામાં લોકો આજે પણ અંધશ્રદ્ધાના દલદલમાં કેવી રીતે ખૂંપી જાય છે તેનો એક અત્યંત ચોંકાવનારો કિસ્સો સામે આવ્યો છે. પુત્ર પ્રાપ્તિની અંધઘેલી ઈચ્છામાં એક પિતાએ ભૂવા-તાંત્રિકની વાતોમાં આવીને એવું ખોફનાક પગલું ભર્યું કે જેને સાંભળીને તબીબો અને સ્થાનિક લોકો પણ સ્તબ્ધ થઈ ગયા છે.

₹૧૦૦ની નોટ ગળીને પેટમાં માર્યો છરો:

મળતી વિગતો અનુસાર, યુવકના ઘરે સતત દીકરીઓનો જન્મ થતાં તે પુત્ર રત્નની પ્રાપ્તિ માટે આતુર હતો. આ ઘેલછામાં તે એક તાંત્રિકના સંપર્કમાં આવ્યો હતો. તાંત્રિકે પુત્ર જન્મના અંધશ્રદ્ધાળુ ઉપાય તરીકે તેને ખાસ વિધિ કરવા જણાવ્યું હતું. આ તાંત્રિકી વિધિના ભાગરૂપે યુવકે પહેલા ₹૧૦૦ની ચલણી નોટ ગળી લીધી હતી અને ત્યારબાદ તે નોટને પેટમાંથી બહાર કાઢવાના કે વિધિ પૂરી કરવાના બહાને પોતાના જ પેટમાં તીક્ષ્ણ છરો હુલાવી દીધો હતો.

તબીબો પણ ચોંકી ઉઠ્યા, હાલત ગંભીર:

લોહીલુહાણ હાલતમાં યુવકને તાત્કાલિક નજીકની હોસ્પિટલમાં સારવાર અર્થે ખસેડવામાં આવ્યો હતો. ઘટનાની જાણ થતાં જ હોસ્પિટલના તબીબો અને પોલીસ કાફલો ઘટનાસ્થળે દોડી ગયો હતો. યુવકની પ્રાથમિક તપાસ બાદ તબીબો પણ અંધશ્રદ્ધાના આ ખૌફનાક ખેલને જોઈને આશ્ચર્યચકિત થઈ ગયા હતા.

હાલ યુવકની સારવાર ચાલી રહી છે અને તેની હાલત ગંભીર જણાવાઈ રહી છે. આ મામલે સ્થાનિક પોલીસે અંધશ્રદ્ધા ફેલાવનાર અને યુવકને ઉશ્કેરનાર તાંત્રિક વિરુદ્ધ તપાસના ચક્રો ગતિમાન કર્યા છે.