નવી દિલ્હી:સુપ્રીમ કોર્ટે સોમવારના રોજ ગુજરાત સરકાર દ્વારા આસારામ બાપુના મોટેરા સ્થિત આશ્રમની જમીનો જપ્ત કરવા અને ખાલી કરાવવાની કાર્યવાહી પર વચગાળાની રોક લગાવી દીધી છે. જસ્ટિસ વિક્રમ નાથ અને જસ્ટિસ સંદીપ મહેતાની ખંડપીઠે આ મામલે સુનાવણી કરતા જણાવ્યું હતું કે, રાજ્ય સરકાર દ્વારા આશ્રમ ટ્રસ્ટને આપવામાં આવેલી કારણદર્શક નોટિસમાં આક્ષેપોને સાબિત કરવા માટે પૂરતી વિગતો કે પુરાવાઓનો અભાવ છે. આ સાથે કોર્ટે રાજ્ય સરકારને વિગતવાર જવાબ રજૂ કરવા આદેશ આપ્યો છે.

જમીન વિવાદની પૃષ્ઠભૂમિ અને આક્ષેપો:

આ સમગ્ર વિવાદ અમદાવાદના મોટેરા ગામમાં આવેલી આશ્રમની જમીન સાથે જોડાયેલો છે. મૂળભૂત રીતે વર્ષ ૧૯૮૦માં આશ્રમ અને શૈક્ષણિક પ્રવૃત્તિઓ માટે ૬,૨૬૧ ચોરસ મીટર જમીન ફાળવવામાં આવી હતી. ત્યારબાદ, ૧૯૯૨માં વધારાની ૧૦,૦૦૦ ચોરસ મીટર જમીનના કબજાને કેટલીક શરતો સાથે નિયમિત કરવામાં આવ્યો હતો. જોકે, મહેસૂલ વિભાગના નિરીક્ષણ મુજબ આશ્રમ ટ્રસ્ટ પાસે હાલ કુલ ૪૯,૭૫૮ ચોરસ મીટર જમીન છે, જેમાંથી અંદાજે ૧૫,૭૭૮ ચોરસ મીટર જમીન પર ગેરકાયદેસર કબજો હોવાનો સરકારનો દાવો છે. જેમાં સાબરમતી નદીના પટની ૬,૧૦૪ ચોરસ મીટર જમીનનો પણ સમાવેશ થાય છે.

સુપ્રીમ કોર્ટમાં કાનૂની દલીલો:

આશ્રમ ટ્રસ્ટ તરફથી હાજર રહેલા વરિષ્ઠ ધારાશાસ્ત્રી મુકુલ રોહતગીએ દલીલ કરી હતી કે સરકારે ટ્રસ્ટ પર ફાળવેલી જમીનમાંથી નફો કમાવવાનો (Profiteering) આક્ષેપ કર્યો છે, પરંતુ નોટિસમાં આ બાબતે કોઈ સ્પષ્ટ વિગતો આપી નથી. આ દલીલને ગ્રાહ્ય રાખતા સુપ્રીમ કોર્ટે સરકારને સવાલ કર્યો હતો કે, "તમે કયા નફાની વાત કરો છો? આવી અસ્પષ્ટ નોટિસ પર કોઈ પક્ષકાર જવાબ કેવી રીતે આપી શકે? તમારી નોટિસ પ્રથમ દૃષ્ટિએ પાયાવિહોણી લાગે છે."

હાઈકોર્ટનો ચુકાદો અને ઓલિમ્પિક કનેક્શન:

અગાઉ ગુજરાત હાઈકોર્ટે સરકારની કાર્યવાહીને માન્ય રાખતા જણાવ્યું હતું કે ટ્રસ્ટે કલેક્ટરની પૂર્વ મંજૂરી વગર બાંધકામ કરીને શરતોનો ભંગ કર્યો છે. આ કેસમાં એવી વિગતો પણ સામે આવી હતી કે આ જમીનની આસપાસ સરદાર વલ્લભભાઈ પટેલ સ્પોર્ટ્સ એન્ક્લેવ અને ૨૦૩૬ ઓલિમ્પિક્સ સંબંધિત વિકાસ કાર્યોનું આયોજન છે. જોકે, હાઈકોર્ટે ટ્રસ્ટના બદઈરાદાના આક્ષેપોને નકારી કાઢ્યા હતા. હવે સુપ્રીમ કોર્ટે આ મામલે હસ્તક્ષેપ કરીને આશ્રમને તાત્કાલિક ખાલી કરાવવા પર રોક લગાવી છે અને વધુ સુનાવણી ૫ મેના રોજ હાથ ધરવાનું નક્કી કર્યું છે.