સુરત : સોશિયલ મીડિયા પર ટૂંકી પ્રસિદ્ધિ અને લાઈક્સ મેળવવા માટે આજકાલના યુવાનો પોતાના જીવને જોખમમાં મૂકતા પણ ખચકાતા નથી. સુરત ખાતેથી આવો જ એક ચોંકાવનારો અને અત્યંત ભયાનક વીડિયો સામે આવ્યો છે, જેમાં એક યુવક ચાલુ ટ્રેને દરવાજે ઊભા રહીને જાનના જોખમે સ્ટંટ અને કરતબ બતાવતો નજરે પડે છે. આ જોખમી રીલ સોશિયલ મીડિયા પર વાયરલ થતાં જ લોકોમાં ભારે આક્રોશ જોવા મળી રહ્યો છે.

વાયરલ થયેલી રીલમાં સ્પષ્ટપણે જોઈ શકાય છે કે યુવક ટ્રેનની સ્પીડ વચ્ચે બહાર લટકીને ખતરનાક પોઝ આપી રહ્યો છે. સહેજ પણ પગ લપસે તો સીધું મોત નીપજે તેવી આશંકા હોવા છતાં યુવક બેફિકર બનીને વીડિયો શૂટ કરાવી રહ્યો છે. આ પ્રકારની સ્ટંટબાજી માત્ર પોતાના જીવન માટે જ નહીં પરંતુ અન્ય મુસાફરોની સુરક્ષા માટે પણ ગંભીર ખતરો ઊભો કરે છે.

રેલવે પોલીસ અને પ્રશાસન કડક કાર્યવાહી કરે તેવી માંગ

આ વીડિયો સામે આવ્યા બાદ સોશિયલ મીડિયા યુઝર્સ દ્વારા રેલવે પોલીસ (RPF) અને સ્થાનિક પ્રશાસનને ટેગ કરીને આ યુવક સામે કડકમાં કડક કાયદાકીય કાર્યવાહી કરવાની માંગ કરવામાં આવી રહી છે. ભૂતકાળમાં પણ આ પ્રકારે રીલ્સ બનાવવાના ચસકામાં અનેક યુવાનોએ પોતાના જીવ ગુમાવ્યા છે, ત્યારે આવા બેજવાબદાર તત્વો સામે દાખલારૂપ પગલાં ભરવા જરૂરી બન્યા છે.