સુરત પોલીસ એક્શન મોડમાં આવી છે. તહેવારોના દિવસોમાં કાયદો અને વ્યવસ્થાની પરિસ્થિતિ કથળે નહીં તે માટે સુરત પોલીસના ઝોન ૨ વિસ્તાર હેઠળ આવતા વિવિધ પોલીસ સ્ટેશનો દ્વારા મોડી રાત્રે એકસાથે મેગા કોમ્બિંગ ઓપરેશન હાથ ધરવામાં આવ્યું હતું. તંત્રના આ અચાનક પગલાથી અસામાજિક તત્વોમાં ભારે ફાળ પડી ગઈ છે

  પોલીસ દ્વારા હાથ ધરવામાં આવેલા આ સઘન ચેકિંગ અભિયાન દરમિયાન ખાસ કરીને લીંબાયત, સારોલી, ગોડાદરા, ઉધના અને સલાબતપુરા જેવા વિસ્તારના સંવેદનશીલ પોઈન્ટ્સ પર નાકાબંધી કરીને તપાસ કરવામાં આવી હતી. આ મેગા કોમ્બિંગ દરમિયાન પોલીસે ભૂતકાળમાં ગુનાહિત ઇતિહાસ ધરાવતા અને શંકાસ્પદ જણાતા 196 જેટલા શખ્સોને ઝડપી પાડી તેમની અટકાયત કરી હતી. .

પોલીસ સ્ટેશને લવાયેલા તમામ અસામાજિક અને ગુનાહિત માનસિકતા ધરાવતા ઇસમો સામે કાયદેસરની કડક કાર્યવાહી કરવામાં આવી હતી. આ ઉપરાંત, આગામી તહેવારો દરમિયાન કોઈપણ પ્રકારની ગેરરીતિ આચર્યા વગર શાંતિ જાળવવા અને કાયદા-વ્યવસ્થાનું ચુસ્તપણે પાલન કરવા અંગે તમામ આરોપીઓને આકરી ચેતવણી અને સૂચનાઓ આપવામાં આવી હતી. સુરત પોલીસનું આ અભિયાન આગળ પણ ચાલુ રહેશે તેમ જાણવા મળ્યું છે