સુરત, તા.૦૨: જન્માષ્ટમીનો પવિત્ર તહેવાર જેમ-જેમ નજીક આવી રહ્યો છે, તેમ-તેમ ડાયમંડનગરી સુરતમાં કાન્હાને ઝુલાવવા માટે ચાંદીના પારણાં ખરીદવાનો ભારે ઉત્સાહ અને ક્રેઝ જોવા મળી રહ્યો છે. શહેરના જ્વેલરી બજારોમાં અવનવી ડિઝાઈન અને આકર્ષક કલાત્મક કારીગરી ધરાવતા પારણાં ભક્તોને મંત્રમુગ્ધ કરી રહ્યા છે. સુરતના બજારમાં ૧૧ ગ્રામથી શરૂ કરીને ૨ કિલો સુધીના વજન ધરાવતા ચાંદીના પારણાં ઉપલબ્ધ છે, જેની કિંમત ૫ હજાર રૂપિયાથી લઈને ૮ લાખ રૂપિયા સુધીની છે. ભક્તો પોતાની શ્રદ્ધા અને બજેટ અનુસાર આ પારણાં ખરીદીને ઉત્સવની તૈયારીઓમાં જોતરાયા છે.

વિવિધ સાઈઝની મૂર્તિઓ અને નવો ફ્યુઝન ટ્રેન્ડ

કનૈયાની સુંદર મૂર્તિઓમાં પણ ૨૦ ગ્રામથી લઈને ૧ કિલો સુધીની વિવિધ સાઇઝ અને મનમોહક સ્વરૂપો બજારમાં ઉપલબ્ધ છે. ગત વર્ષની સરખામણીમાં ચાંદીના ભાવોમાં થયેલા ફેરફારોને ધ્યાનમાં રાખીને સુરતના ઝવેરીઓએ મધ્યમ વર્ગના ગ્રાહકો માટે એકદમ નવો અને આકર્ષક કોન્સેપ્ટ રજૂ કર્યો છે. લાકડા (વુડ) ઉપર સુંદર કોતરણી કામ કરીને તેની પર ચાંદીનું લેયરિંગ ચડાવવામાં આવ્યું છે.

આ વુડન-સિલ્વર ફ્યુઝનવાળા પારણાં દેખાવમાં અત્યંત ભવ્ય અને શાહી લાગે છે, જેના કારણે ગ્રાહકોને ચાંદીનો શુકન પણ મળી રહે છે અને બજેટ પર વધુ ભારણ પણ આવતું નથી. આ નવીન ટ્રેન્ડ ખાસ કરીને યુવા વર્ગમાં ખૂબ જ લોકપ્રિય થઈ રહ્યો છે. ચાંદીના ભાવો સ્થિર હોવાના કારણે લોકો કોઈપણ ખચકાટ વગર એડવાન્સ બુકિંગ કરાવી રહ્યા છે. જન્માષ્ટમીને લઈને શહેરના તમામ ઝવેરી શોરૂમ્સમાં લાલાના વાઘા અને પારણાં ખરીદવા માટે ભક્તોની ભારે ભીડ જામી રહી છે.