અમદાવાદ : અમદાવાદ શહેરના નિરાંત ચોકડી વિસ્તારમાં આજે(૨૮ મે) બપોરના સમયે એક અકસ્માત સર્જાયો હતો. આ ઘટનામાં AMC(અમદાવાદ મ્યુનિસિપલ કોર્પોરેશન)ના ડમ્પરના કારણે ટ્રાફિક પોલીસ દ્વારા બનાવવામાં આવેલો શેડ અચાનક ધરાશાયી થઈ ગયો હતો. આ શેડ ખાસ કરીને ઉનાળાની ગરમીમાં ટ્રાફિક પોલીસ કર્મચારીઓ અને રાહદારીઓને રાહત મળે તે હેતુથી બનાવવામાં આવ્યો હતો. અકસ્માતની આ ઘટનમાં કોઈ મોટી જાનહાનિ થઈ નહોતી.

પ્રાપ્ત માહિતી અનુસાર, AMCનું ડમ્પર પસાર થતી વખતે શેડના સ્ટ્રક્ચર સાથે અથડાતા આખો શેડ નીચે તૂટી પડ્યો હતો. ઘટનાના સમયે આસપાસ લોકો અને વાહનોની અવરજવર ચાલી રહી હતી, જેના કારણે એક વાહનને નુકસાન પહોંચ્યું હોવાનું જાણવા મળ્યું છે.

સદનસીબે, ઘટનામાં કોઈ મોટી જાનહાની કે ગંભીર ઈજા નોંધાઈ નથી. સ્થાનિક લોકોના જણાવ્યા મુજબ, જો આ ઘટના થોડા સમય પહેલાં અથવા ટ્રાફિક વધુ હોય ત્યારે બની હોત તો મોટી દુર્ઘટના સર્જાઈ શકતી હતી.

ઘટના બાદ ટ્રાફિક પોલીસ અને સ્થાનિક તંત્ર તાત્કાલિક સ્થળ પર પહોંચી ગયું હતું અને માર્ગ પરથી અવરોધ દૂર કરવાની કામગીરી હાથ ધરાઈ હતી. આ બનાવ બાદ શેડની સુરક્ષા અને વાહનોની અવરજવર અંગે અનેક પ્રશ્નો ઊભા થયા છે. સ્થાનિક નાગરિકોએ તંત્ર પાસે આવી ઘટનાઓ ફરી ન બને તે માટે યોગ્ય સુરક્ષા વ્યવસ્થા અને દેખરેખ વધારવાની માગ કરી છે