સુરતના સચિન GIDC વિસ્તારમાં એક કરુણ અને હૃદયદ્રાવક ઘટના સામે આવી છે, જેમાં મહાવીર સોસાયટી નજીક પાણીથી ભરેલા ખાડામાં ડૂબી જવાથી બે માસૂમ બાળકોના મોત નીપજ્યા છે.

   પ્રાપ્ત વિગતો અનુસાર, આ બંને બાળકોની ઉંમર 7 થી 8 વર્ષની હતી અને તેઓ રમતા-રમતા અચાનક પાણી ભરેલા ખાડામાં પડી ગયા હતા. આ ખાડો છઠ પૂજાના આયોજન માટે ખોદવામાં આવ્યો હતો, જેમાં વરસાદી પાણી ભરાઈ ગયું હતું. આ ગમગીન ઘટનાની જાણ થતા જ ફાયર વિભાગ અને સ્થાનિક પોલીસ તુરંત ઘટનાસ્થળે દોડી આવી હતી અને શોધખોળ હાથ ધરી હતી, પરંતુ આ અકસ્માતે સમગ્ર વિસ્તારમાં શોકની લાગણી ફેલાવી દીધી છે.