અમદાવાદના પૂર્વ વિસ્તારમાં આવેલા અર્બુદાનગરમાં જમીન અને મિલકતના વિવાદમાં સમાધાન કરવા એકઠા થયેલા પરિવારમાં અચાનક લોહિયાળ સંઘર્ષ સર્જાયો હતો. આ ચકચારી ફાયરિંગ કેસમાં સામાન્ય બોલાચાલી બાદ ઉશ્કેરાયેલા BSF જવાન પ્રમોદ પ્રજાપતિએ પોતાની 12 બોરની બંદૂક વડે સગા ભાઈ રાજેશભાઈ પર બે રાઉન્ડ ફાયરિંગ કરી પગના ભાગે ઈજા પહોંચાડી હતી.

અમદાવાદ શહેરના રામોલ પોલીસ સ્ટેશન વિસ્તાર હેઠળ આવેલી અર્બુદાનગર સોસાયટીમાં મિલકતના ભાગલાને લઈને એક જ પરિવારના ત્રણ ભાઈઓ વચ્ચે વિવાદ ચાલી રહ્યો હતો. આ પારિવારિક મનદુઃખનો શાંતિપૂર્ણ અંત લાવવા માટે ભાઈઓ એકઠા થયા હતા. જોકે, વાતચીત દરમિયાન જૂના આક્ષેપો-પ્રતિઆક્ષેપો શરૂ થતાં માહોલ તંગ બન્યો હતો.

શાંતિપૂર્ણ સમાધાન માટે બોલાવાયેલી બેઠક થોડી જ મિનિટોમાં ઉગ્ર બોલાચાલી અને બાદમાં હાથપાઈમાં ફેરવાઈ ગઈ હતી. ઉશ્કેરાટ એટલી હદે વધી ગયો કે લાન્સ નાયક તરીકે ફરજ બજાવતા ભાઈઓએ કાયદો હાથમાં લઈને ગોળીબાર સુધીનું પગલું ભરી લીધું હતું, જેનાથી સમગ્ર વિસ્તારમાં ભયનો માહોલ છવાઈ ગયો હતો.

ઝપાઝપી દરમિયાન આરોપી પ્રમોદ પ્રજાપતિએ ઘરમાંથી પોતાની 12 બોરની લાઈસન્સવાળી બંદૂક કાઢીને સીધા બે રાઉન્ડ ફાયરિંગ કર્યા હતા. આ ફાયરિંગ દરમિયાન એક ગોળી તેમના સગા ભાઈ રાજેશભાઈ પ્રજાપતિના પગના ભાગે વાગતાં તેઓ લોહીલુહાણ હાલતમાં જમીન પર ઢળી પડ્યા હતા.

પ્રાથમિક પોલીસ તપાસમાં બહાર આવેલી વિગતો અનુસાર, પ્રજાપતિ પરિવાર વચ્ચે ઓઢવ અને રામોલ વિસ્તારમાં આવેલી કિંમતી જમીન તથા મિલકતના હિસ્સાને લઈને લાંબા સમયથી ગંભીર મતભેદો ચાલતા હતા. જમીનના ભાવ વધતાં ભાગલા અંગે ત્રણેય ભાઈઓ વચ્ચે વારંવાર ખેંચતાણ થતી હતી.

અગાઉ પણ આ મામલે પંચાયતો અને ચર્ચાઓ થઈ હતી પરંતુ કોઈ સુખદ ઉકેલ આવ્યો નહોતો. સેના જેવા શિસ્તબદ્ધ સુરક્ષા દળમાં ફરજ બજાવતા ભાઈઓએ સામાન્ય મિલકત માટે સગા ભાઈ પર હથિયાર ઉઠાવવાની ઘટનાએ શહેરીજનો અને સુરક્ષા એજન્સીઓ બંનેને ચોંકાવી દીધા છે.