અમદાવાદ: દેશમાંથી ડ્રગ્સના દૂષણને નેસ્તનાબૂદ કરવા માટે કેન્દ્રીય ગૃહ અને સહકાર મંત્રી અમિત શાહે અત્યંત આક્રમક વલણ અપનાવ્યું છે. અમદાવાદ ખાતે ૧૪૦૦ કરોડથી વધુના વિકાસકામોના લોકાર્પણ અને ખાતમુહૂર્ત પ્રસંગે ઉપસ્થિત જનમેદનીને સંબોધતા તેમણે જાહેરાત કરી હતી કે દેશભરને ૨૦૨૯ સુધીમાં નશામુક્ત બનાવવાનો લક્ષ્યાંક રાખવામાં આવ્યો છે, પરંતુ ગુજરાત ૨૦૨૯ સુધી રાહ જોયા વગર આગામી ૩૧ ડિસેમ્બર ૨૦૨૮ પહેલા જ સંપૂર્ણપણે ડ્રગ્સ ફ્રી રાજ્ય બની જશે. તેમણે નાગરિકોને અપીલ કરી હતી કે જો આસપાસ ક્યાંય પણ ડ્રગ્સનું વેચાણ કે સેવન થતું હોય તો ૧ ડિસેમ્બર પછી ૧૦૩૩ નંબર પર બેધડક જાણ કરવી.

અમિત શાહે સ્પષ્ટ શબ્દોમાં જણાવ્યું હતું કે નશો આપણી યુવા પેઢી અને દેશના ભવિષ્યને બરબાદ કરવાનું પાપ કરી રહ્યો છે, તેમજ ડ્રગ્સના વેચાણથી આવતા કાળા નાણાંનો ઉપયોગ દેશમાં આતંકવાદ ફેલાવવા માટે થાય છે. કાળી ચૌદશના દિવસે મળેલી કેન્દ્ર અને રાજ્ય સરકારના ગૃહ વિભાગની સંયુક્ત બેઠકમાં ડ્રગ્સ વિરુદ્ધ સઘન અભિયાન ચલાવવાનો નિર્ણય લેવાયો છે. ૧ ડિસેમ્બરથી કાર્યરત થનારા '૧૦૩૩' ટોલ ફ્રી નંબર પર કોઈપણ નાગરિક ડ્રગ્સ વેચાણ અંગે માહિતી આપી શકશે અને માહિતી આપનાર વ્યક્તિની ઓળખ તથા નામ સંપૂર્ણપણે ગુપ્ત રાખવામાં આવશે. સરકાર દ્વારા માત્ર ત્રણ કલાકની અંદર જ આવી સૂચનાઓ પર સખત રેડ અને કાનૂની કાર્યવાહી કરવાની વૈજ્ઞાનિક વ્યવસ્થા ગોઠવવામાં આવી છે.

ગૃહમંત્રીએ વાલીઓ અને શિક્ષકોને પણ વિશેષ જવાબદારી સોંપતા કહ્યું હતું કે બાળકોના વર્તનમાં થતા ફેરફારો જેવા કે આંખો લાલ થવી કે સતત ઊંઘ આવવી પર ખાસ નજર રાખવી જરૂરી છે. ડ્રગ્સની લતનો ભોગ બનેલા યુવાનો માટે વિશેષ ડી-એડિક્શન સેન્ટર્સ પણ શરૂ કરવામાં આવી રહ્યા છે, જેથી સંતાનોને સમયસર સાજા કરી શકાય. તેમણે ચેતવણી આપી હતી કે ડ્રગ્સનું વેચાણ કરનારાઓ અને તેના મુખ્ય સરગનાઓને શોધી શોધીને કડકમાં કડક કાનૂની કાર્યવાહી દ્વારા જેલના સળિયા પાછળ ધકેલી દેવામાં આવશે. સરકાર અને પ્રશાસન પોતાની તમામ તાકાત કામે લગાડી રહી છે, પરંતુ જનસહયોગ વિના આ લડાઈ જીતી શકાતી નથી.

આ ઐતિહાસિક જાહેરાત બાદ આગામી ૧ ડિસેમ્બરથી ગુજરાતભરમાં પોલીસ અને એજન્સીઓ દ્વારા ડ્રગ્સ વિરુદ્ધનું મહાઅભિયાન શરૂ કરવામાં આવશે, જેમાં ૧૦૩૩ કંટ્રોલ રૂમ સીધો ગાંધીનગરથી સુપરવાઈઝ થશે. રાજ્યના તમામ જિલ્લાઓમાં શૈક્ષણિક સંસ્થાઓ અને યુવા જાગૃતિ અભિયાન અંતર્ગત વિશેષ સેમિનારો યોજવાની તૈયારીઓ શરૂ કરી દેવામાં આવી છે, જ્યારે ગુનેગારોની પ્રોપર્ટી જપ્ત કરવા અને કડક કાયદાકીય શિકંજો કસવા માટે પોલીસ તંત્રને વિશેષ સૂચનાઓ જારી કરાઈ છે.