દાહોદ : દાહોદ જિલ્લામાં દિવાળીના પાવન પર્વ અને ખાસ કરીને બેસતા વર્ષના દિવસે આદિવાસી સમાજ દ્વારા આસ્થા અને પરંપરાનું અનોખું દર્શન કરાવતા 'ગાય ગોહરી' ના લોકપર્વની હર્ષોલ્લાસ સાથે ઉજવણી કરવામાં આવી છે.

પ્રાપ્ત વિગતો અનુસાર, દાહોદ શહેર તેમજ ગરબાડા, ગાંગરડી અને ઝાલોદ જેવા ગ્રામીણ વિસ્તારોમાં યોજાયેલી આ હજારો વર્ષ જૂની પરંપરામાં ગાયોને સુંદર રીતે રંગરોગાન કરીને શણગારવામાં આવી હતી અને ગામના મુખ્ય ચોક પર પૂજનવિધિ સંપન્ન કરવામાં આવી હતી.

પૂજા વિધિ પૂર્ણ થયા બાદ ઉત્સાહપૂર્વક ગાયોને દોડાવવામાં આવી હતી, જ્યાં બાધા રાખનારા આદિવાસી ખેડૂતો અને શ્રદ્ધાળુઓ જમીન પર સૂઈ ગયા હતા અને ગાયોનાં ટોળાં તેમના શરીર પરથી પસાર થયા હતા.

આ અનોખી પ્રથા પાછળ એવી ધાર્મિક માન્યતા જોડાયેલી છે કે ખેતીકામ દરમિયાન વર્ષ દરમિયાન અજાણતાં ગાય માતાને થયેલા નુકસાન બદલ ક્ષમા માંગવામાં આવે છે અને ગાયોના આશીર્વાદથી આગામી વર્ષ ખેતી માટે ફળદ્રુપ નીવડે છે.

સ્થાનિક માન્યતાઓ મુજબ આ હજારો વર્ષ જૂની પરંપરા દરમિયાન આસ્થા સાથે જોડાયેલા શ્રદ્ધાળુઓને કોઈ ઈજા થતી નથી, અને આ દ્રશ્ય નિહાળવા માટે આસપાસના ગ્રામીણ વિસ્તારોમાંથી મોટી સંખ્યામાં લોકો ઉપસ્થિત રહ્યા હતા.
 

આગામી સમયમાં પણ આદિવાસી સમાજ પોતાની આ સાંસ્કૃતિક વિરાસત અને ગાય માતા પ્રત્યેની અપાર શ્રદ્ધાને આ જ રીતે જીવંત રાખશે, જે સ્થાનિક લોકજીવનનું એક અભિન્ન અંગ બની ચૂકી છે.