વડનગર : ગુજરાતના ઐતિહાસિક અને અંદાજે અઢી હજાર વર્ષ જૂનો સાંસ્કૃતિક વારસો ધરાવતા પૌરાણિક નગર વડનગર ખાતે વિશ્વ શાંતિ અને લોકકલ્યાણના દિવ્ય ઉદ્દેશ્ય સાથે ભવ્ય વિશ્વ શાંતિ મહાયજ્ઞનો પ્રારંભ થયો છે. સ્થાનિક પ્રાચીન હાટકેશ્વર મહાદેવ મંદિરના પરિસરમાં યોજાયેલા આ ધાર્મિક મહોત્સવમાં મોટી સંખ્યામાં શ્રદ્ધાળુઓ અને વૈદિક વિદ્વાનો ઉપસ્થિત રહ્યા છે.
કાંચી કામકોટી પીઠમના 70મા પીઠાધિપતિ જગદ્ગુરુ શંકરાચાર્ય શ્રી શંકર વિજયેન્દ્ર સરસ્વતીના પવિત્ર સાંનિધ્યમાં આ દસ દિવસીય મહાયજ્ઞનું આયોજન કરવામાં આવ્યું છે. આ મહોત્સવ અંતર્ગત દેશભરમાંથી પધારેલા 144 જેટલા પ્રકાંડ વેદ પંડિતો દ્વારા વૈદિક મંત્રોચ્ચાર અને વિધિ-વિધાન સાથે વિશેષ અનુષ્ઠાનો શરૂ કરવામાં આવ્યા છે.
આ ભવ્ય આયોજનમાં ભગવાન રુદ્રનો અભિષેક, અગ્નિહોત્ર તેમજ સહસ્રચંડી અને અતિરુદ્ર મહાયજ્ઞ જેવા કઠિન અને વિશિષ્ટ વૈદિક અનુષ્ઠાનોનો સમાવેશ થાય છે. દસ દિવસ સુધી ચાલનારા આ ધાર્મિક અનુષ્ઠાનોના માધ્યમથી સમગ્ર વિશ્વમાં શાંતિ, સામાજિક સદ્ભાવ અને સમસ્ત માનવજાતના કલ્યાણની કામના કરવામાં આવી રહી છે.
ઉલ્લેખનીય છે કે, સ્કંદ પુરાણના નાગરખંડમાં પણ વડનગર અને હાટકેશ્વર મહાદેવના મહિમાનો વિશેષ ઉલ્લેખ જોવા મળે છે. આ ધાર્મિક મહોત્સવ આગામી 20 નવેમ્બર સુધી નિર્ધારિત સમય અનુસાર ચાલશે, જેમાં ગુજરાત તેમજ દેશના વિવિધ રાજ્યોમાંથી શ્રદ્ધાળુઓ પધારીને ધર્મલાભ પ્રાપ્ત કરી રહ્યા છે.