વડોદરા : ઔદ્યોગિક અને શૈક્ષણિક ક્ષેત્રે ગુજરાતનું ગૌરવ વધારતું વડોદરા શહેર હવે રોકાણ અને ઇન્ફ્રાસ્ટ્રક્ચરનું 'પાવરહાઉસ' બનવા તરફ અગ્રેસર છે. આગામી સમયમાં મધ્ય ગુજરાત વિસ્તાર માટે આયોજિત 'વાઇબ્રન્ટ ગુજરાત રિજનલ કોન્ફરન્સ' (VGRC) વડોદરાને વૈશ્વિક સ્તરે નવી ઓળખ અપાવશે. આ મંચ પર રાજ્યની ઔદ્યોગિક ક્ષમતા, નવીન ટેક્નોલોજી અને સંશોધન આધારિત વિકાસને એક નવું સોપાન મળશે, જે વડોદરાને રોકાણકારો માટેનું આકર્ષણનું કેન્દ્ર બનાવશે.
ગતિ શક્તિ યુનિવર્સિટી: ઉદ્યોગ અને નવીનતાનો સંગમ
વડોદરાના લાલબાગ સ્થિત 'ગતિ શક્તિ વિશ્વવિદ્યાલય' (GSV) માત્ર એક શિક્ષણ સંસ્થા નથી, પરંતુ તે દેશના પરિવહન અને લોજિસ્ટિક્સ ક્ષેત્રના ભવિષ્યને ઘડનારી "ઇન્ડસ્ટ્રી ડ્રિવન" પ્રયોગશાળા છે. અહીં રેલવે, એવિએશન, મેરિટાઈમ અને મેટ્રો રેલ જેવા ભવિષ્યલક્ષી ક્ષેત્રોના વિશ્વસ્તરીય કોર્સ ભણાવવામાં આવે છે. વાઘોડિયામાં નવા કેમ્પસના નિર્માણ સાથે, GSV દેશના 23 રાજ્યોના વિદ્યાર્થીઓને એક મજબૂત રાષ્ટ્રીય ઇકોસિસ્ટમ પૂરું પાડી રહ્યું છે, જે પીએમ ગતિ શક્તિ નેશનલ માસ્ટર પ્લાન સાથે સીધું જોડાયેલું છે.
ગ્લોબલ પાર્ટનરશિપ અને આત્મનિર્ભર ભારતનું વિઝન
GSV ની સૌથી મોટી તાકાત તેનો ઉદ્યોગ જગત સાથેનો સીધો સહયોગ છે. એરબસ, L&T, સિમેન્સ, એમેઝોન અને DRDO જેવી અનેક વૈશ્વિક સંસ્થાઓ સાથેના જોડાણને કારણે વિદ્યાર્થીઓને લાઈવ પ્રોજેક્ટ્સ અને ઇન્ડસ્ટ્રી ઇન્ટર્નશિપ દ્વારા પ્રાયોગિક અનુભવ મળે છે. ખાસ કરીને સસ્ટેનેબલ એવિએશન ફ્યુલ અને AI આધારિત ટ્રાન્સપોર્ટ સિસ્ટમ જેવા પ્રોજેક્ટ્સ પર ધ્યાન કેન્દ્રિત કરીને આ યુનિવર્સિટી 'આત્મનિર્ભર ભારત'ના સ્વપ્નને સાકાર કરી રહી છે.
ઉચ્ચ પ્લેસમેન્ટ અને ઉજ્જવળ કારકિર્દી
પ્લેસમેન્ટના આંકડાઓ જ આ સંસ્થાની સફળતાની સાક્ષી પૂરે છે. સિમેન્સ, અલ્સ્ટોમ, ટાટા અને હિન્દુસ્તાન યુનિલિવર જેવી 60 થી વધુ દિગ્ગજ કંપનીઓએ GSV માં કેમ્પસ પ્લેસમેન્ટ દ્વારા વિદ્યાર્થીઓને તક આપી છે. છેલ્લા બે વર્ષમાં 90% ની આસપાસના પ્લેસમેન્ટ રેશિયોએ સાબિત કર્યું છે કે વડોદરાનું આ યુનિવર્સિટી મોડેલ દેશભરમાં શ્રેષ્ઠ છે. દર વર્ષે હજારો અધિકારીઓને એક્ઝિક્યુટિવ તાલીમ આપીને આ સંસ્થા ભારતને વિશ્વના ફલક પર વધુ સક્ષમ બનાવી રહી છે.
વડોદરા હવે માત્ર એક શહેર નથી, પરંતુ નવી પેઢીને આધુનિક અર્થતંત્ર માટે તૈયાર કરતું એક સક્ષમ માધ્યમ બની રહ્યું છે.