ડાંગ જિલ્લાના વઘઇ તાલુકા પંચાયતની પ્રમુખ અને ઉપપ્રમુખની ચૂંટણીમાં ભારે રસાકસી બાદ એક અદભુત અને રોમાંચક પરિણામ સામે આવ્યું છે. અહીં સત્તાના સુકાન માટે ભાજપ અને કોંગ્રેસ વચ્ચે કાંટાની ટક્કર જોવા મળી હતી. ચૂંટણી પ્રક્રિયાના અંતે વઘઇ તાલુકા પંચાયતમાં પ્રમુખ પદ ભાજપના ફાળે ગયું છે, જ્યારે ઉપપ્રમુખ પદ પર કોંગ્રેસે કબજો જમાવ્યો છે.

વઘઇ તાલુકા પંચાયતની કુલ 16 બેઠકો માટે યોજાયેલી આ ચૂંટણીમાં બંને મુખ્ય પક્ષો વચ્ચે જોરદાર ટક્કર થઈ હતી. ચૂંટણીના પરિણામોમાં કોંગ્રેસને 8 અને ભાજપને પણ 8 બેઠકો મળતા મામલો બરાબરની ટાઈ પર આવીને અટકી ગયો હતો. સત્તાનું પલ્લું કઈ તરફ નમશે તે નક્કી કરવા માટે આખરે નિયમ મુજબ એક નાનકડી બાળકીના હાથે ચિઠ્ઠી ઉછાળવામાં આવી હતી, જેમાં નસીબે ભાજપનો સાથ આપ્યો હતો.

આ રસપ્રદ ચિઠ્ઠી સિસ્ટમના આધારે વઘઇ તાલુકા પંચાયતના પ્રમુખ તરીકે ભાજપના શકુંતલાબેન પાડવી વિજેતા જાહેર થયા હતા. બીજી તરફ, સત્તાના સંતુલન વચ્ચે ઉપપ્રમુખ તરીકે કોંગ્રેસના ઇસદરબેન માહલાના નામે મહોર મારવામાં આવી છે. આમ, એક જ પંચાયતમાં બંને વિરોધી પક્ષોના નેતાઓ સત્તાના ઉચ્ચ હોદ્દા પર સાથે જોવા મળશે.

આ સમગ્ર અનોખી અને સંવેદનશીલ ચૂંટણી પ્રક્રિયા નાયબ જિલ્લા વિકાસ અધિકારીની પ્રત્યક્ષ હાજરીમાં ખૂબ જ શાંતિપૂર્ણ માહોલમાં પૂર્ણ કરવામાં આવી હતી. ચિઠ્ઠી ઉછાળવાની આ પરંપરાગત અને કાનૂની પદ્ધતિને કારણે પંચાયતમાં કોઈ અનિચ્છનીય ઘટના વગર પ્રમુખ અને ઉપપ્રમુખની વરણીનો માર્ગ મોકળો બન્યો હતો, જે હાલ સમગ્ર પંથકમાં ચર્ચાનો વિષય બન્યો છે.