(ભરત શાહ દ્વારા )નર્મદા: દિવાળીના તહેવાર ટાણે જ નર્મદા જિલ્લાના બજારોમાં શાકભાજીના ભાવ આસમાને પહોંચ્યા છે. છેલ્લા એક અઠવાડિયામાં ટમેટા, ડુંગળી, બટાકા અને લીલા શાકભાજીના ભાવમાં 40 થી 60 ટકા સુધીનો વધારો નોંધાયો છે.

રાજપીપળા માર્કેટના આજના ભાવ:
- ટમેટા: 20 રૂપિયેથી વધીને 60-70 રૂપિયા કિલો
- ડુંગળી: 25 રૂપિયેથી વધીને 50-55 રૂપિયા કિલો
- બટાકા: 30 રૂપિયેથી વધીને 45 રૂપિયા કિલો
- લીલા મરચા: 80 થી 100 રૂપિયા કિલો
- કોથમીર અને મેથીની ભાજીની ઝૂડી 10 ને બદલે 20-30 રૂપિયા
કેમ વધ્યા ભાવ?
વેપારીઓનું કહેવું છે કે કમોસમી વરસાદના કારણે પાકને નુકસાન થયું છે. બહારથી આવતો માલ ઓછો થઈ ગયો છે અને ટ્રાન્સપોર્ટ ખર્ચ વધતા ભાવ વધ્યા છે. એક શાકભાજીના વેપારીએ જણાવ્યું, "અમને જ મોંઘું પડે છે તો અમે શું કરીએ. ગ્રાહક પણ ઓછું લઈ જાય છે."
ગૃહિણીઓ પરેશાન
સ્થાનિક ગૃહિણી સોનલબેન જણાવે છે, "રોજની રસોઈ બનાવવી પણ મોંઘી થઈ ગઈ છે. પહેલા 100 રૂપિયામાં થેલી ભરાઈ જતી, હવે 300 રૂપિયામાં પણ થેલી ખાલી લાગે છે."

દિવાળી પહેલા શાકભાજીના ભાવમાં થયેલા આ વધારાએ તહેવારની ખુશીમાં મોંઘવારીનો કડવો સ્વાદ ઉમેર્યો છે