અમદાવાદ : ગુજરાતમાં ધીમે-ધીમે શિયાળાએ દસ્તક દીધી છે અને વહેલી સવારે ગુલાબી ઠંડીનો અનુભવ થઈ રહ્યો છે, ત્યારે હવામાન વિભાગના જણાવ્યા અનુસાર હાલ રાજ્યમાં વાતાવરણ સૂકું રહેવાની સાથે મહત્તમ તાપમાન ૩૫ ડિગ્રી અને લઘુત્તમ તાપમાન ૨૨ ડિગ્રી આસપાસ રહેવાની સંભાવના છે અને ઉત્તર-પૂર્વના પવનો ફૂંકાઈ રહ્યા છે.

પરંતુ બીજી તરફ હવામાન નિષ્ણાત અંબાલાલ પટેલ દ્વારા કરવામાં આવેલી આગાહી મુજબ દિવાળીના તહેવારો અને બેસતા વર્ષથી લઈને લાભ પાંચમ સુધીના દિવસોમાં ગુજરાતના વાતાવરણમાં પલટો આવી શકે છે અને રાજ્યના કેટલાક વિસ્તારોમાં કમોસમી વરસાદ વરસવાની શક્યતા વ્યક્ત કરવામાં આવી છે.

આ ઉપરાંત આગામી ૧૬ નવેમ્બર આસપાસ બંગાળના ઉપસાગરમાં એક મજબૂત સિસ્ટમ સક્રિય થવાની સંભાવના છે, જે ૧૮ થી ૨૨ નવેમ્બર દરમિયાન ગંભીર વાવાઝોડાનું સ્વરૂપ ધારણ કરી શકે છે, જેને પગલે આગામી દિવસોમાં હવામાનની સ્થિતિ પર વિશેષ નજર રાખવી અનિવાર્ય બની છે.

રાષ્ટ્રીય સ્તરે વાત કરીએ તો, દક્ષિણ ભારતના તમિલનાડુ, પુડુચેરી અને કેરળ સહિતના રાજ્યોમાં ભારે પવન, ગાજવીજ અને વીજળીના કડાકાભડાક સાથે ભારે વરસાદનું રેડ એલર્ટ આપવામાં આવ્યું છે, જ્યારે પૂર્વોત્તર રાજ્યો અને આંદામાન-નિકોબારમાં પણ વરસાદી ગતિવિધિઓ જોવા મળી રહી છે.

બીજી તરફ દિલ્હી, ઉત્તર પ્રદેશ, રાજસ્થાન અને મધ્ય પ્રદેશ જેવા ઉત્તર તથા મધ્ય ભારતના મોટાભાગના રાજ્યોમાં હાલ હવામાન સ્વચ્છ અને યથાવત રહેવાની સંભાવના છે, જોકે પહાડી રાજ્યોમાં આગામી ૮ નવેમ્બરથી વેસ્ટર્ન ડિસ્ટર્બન્સને કારણે હવામાનમાં પલટો આવી શકે છે.