અરકાનસાસ,તા.૧૫: ફરી એકવાર અમેરિકાથી ગોળીબારના સમાચાર આવી રહ્યા છે. જ્‍યાં અરકાનસાસ નજીક એક પાર્કમાં ગોળીબારમાં બે લોકોના મોત થયા હતા. નવ લોકો ઘાયલ થયાના અહેવાલ છે. આ ઘટના લિટલ રોકથી લગભગ ૪૩ કિલોમીટર ઉત્તરમાં કોનવે શહેરના ૫મા એવન્‍યુ પાર્કમાં બની હતી. આ કિસ્‍સામાં, કોનવે પોલીસે જણાવ્‍યું હતું કે તમામ ઘાયલ લોકોને નજીકની હોસ્‍પિટલોમાં દાખલ કરવામાં આવ્‍યા છે અને તેમની હાલત હાલમાં સ્‍થિર છે. પોલીસે હજુ સુધી આ ઘટના પાછળ કોણ હતું અથવા ગોળીબાર કેમ થયો તે અંગે કોઈ માહિતી આપી નથી.

ઘટના બાદ સમગ્ર વિસ્‍તારમાં અફડાતફડીનો માહોલ સર્જાયો હતો. તમને જણાવી દઈએ કે જે પાર્કમાં ગોળીબાર થયો હતો તે લગભગ ૧૦ એકરમાં ફેલાયેલો છે અને ત્‍યાં એક મોટું રમતનું મેદાન, બાસ્‍કેટબોલ કોર્ટ અને બાળકો માટે રમવા માટે સ્‍પ્‍લેશપેડ છે. પોલીસ આ મામલાની તપાસ કરી રહી છે.

માર્ચની શરૂઆતમાં, એક બંદૂકધારીએ અરકાનસાસમાં એક ખાનગી પાર્ટીમાં ગોળીબાર કર્યો હતો.  આ ગોળીબારમાં ત્રણ લોકોના મોત થયા હતા અને ચાર ઘાયલ થયા હતા.