સાવધાનઃ જન્ક ફૂડની જાહેરાતો જોઈને બાળકો રોજની વધારાની ૧૩૦ કેલરી આરોગી જાય છે
લંડન,તા.૧૫: યુરોપના રિસર્ચરોએ જણાવ્યું છે કે સાતથી ૧૫ વર્ષનાં બાળકો દરરોજ ટીવી પર માત્ર પાંચ મિનિટ સુધી હાઈ ફેટ, સોલ્ટ એન્ડ શુગર (HFSS) ધરાવતા જન્ક ફૂડની જાહેરાતો જુએ તો સરેરાશ ૧૩૦ વધારાની કેલરી ખાય છે. જન્ક ફૂડની જાહેરાતોને પ્રતિબંધિત કરવા માટે વૈશ્વિક સ્તરે વધી રહેલી માગણી વચ્ચે લિવરપૂલ યુનિવર્સિટી દ્વારા હાથ ધરવામાં આવેલા આ અભ્યાસની વિગતો યુરોપિયન કોન્ગ્રેસ ઓન ઓબેસિટીમાં રજૂ કરવામાં આવી હતી. એમાં જણાવવામાં આવ્યું હતું કે જન્ક ફૂડની જાહેરાતો જોનારાં બાળકો અને કિશોરો દિવસ દરમ્યાન વધુ કેલરી ખાઈ જાય છે.
આ સ્ટડી કરનારાં મુખ્ય લેખક પ્રોફેસર એમ્મા બોયલેન્ડે જણાવ્યું હતું કે ‘આ અભ્યાસ કિશોરો શું ખાય છે, તેમના પર ફૂડ-માર્કેટિંગની કેવી અસર થાય છે એ વિશે નવી મહત્ત્વપૂર્ણ સમજ આપે છે. જન્ક ફૂડની જાહેરાતોના સંપર્કમાં આવવાથી પણ વધુ કેલરીનો વપરાશ થઈ શકે છે અને સમય જતાં વજનમાં વધારો થઈ શકે છે.'
આ સ્ટડીમાં યુનાઇટેડ કિંગડમની સ્કૂલોનાં ૨૪૦ બાળકોનો સમાવેશ કરવામાં આવ્યો હતો. જન્ક ફૂડની જાહેરાતો જોયા પછી બાળકોએ નાસ્તામાં વધુ ૫૮ કેલરી, બપોરના ભોજનમાં વધુ ૭૨ કેલરી અને એકંદરે ૧૩૦ વધુ કેલરી ખાધી હતી.(૪૦.૬)
(9:41 AM IST)
છેલ્લા 8 દિવસમાં સૌથી લોકપ્રિય 
