નવી દિલ્હી:  રશિયન જાસૂસી જહાજ 'યાંતર' બ્રિટિશ જળસીમામાં ઘૂસ્યું અને તેના પર નજર રાખી રહેલા બ્રિટિશ વાયુસેનાના પાઇલટને રોકવા માટે પહેલીવાર લેસર બીમનો ઉપયોગ કર્યો, જેનાથી બંને દેશો વચ્ચે તણાવ વધ્યો છે. બ્રિટનના સંરક્ષણ મંત્રી જૉન હીલીએ યાંતરના આ ખૂબ જ ખતરનાક પગલાને સરકાર ગંભીરતાથી લઈ રહી હોવાનું જણાવ્યું. આ વર્ષે આ બીજી વખત છે જ્યારે જહાજ સ્કોટલેન્ડની ઉત્તરે UKની જળસીમામાં ઘૂસ્યું હોય. હીલીએ ચેતવણી આપી કે જાસૂસી જહાજોના આ શક્તિશાળી લેસર બીમ પાઇલટોની આંખો ચકાચૌંધ કરીને હવાઈ દુર્ઘટનાનું જોખમ વધારે છે. હીલીએ જણાવ્યું કે, 'UK આ જહાજ પર સતત નજર રાખશે અને જો યાંતર પોતાનો માર્ગ બદલે, તો UK પાસે મિલિટરી ઑપ્શન તૈયાર છે.'
જૉન હીલીએ રશિયા અને પુતિનને સ્પષ્ટ સંદેશ આપતાં કહ્યું કે, 'અમે તમને જોઈ રહ્યા છીએ અને તમે શું કરી રહ્યા છો તેની જાણ છે. જો યાંતર આ સપ્તાહે દક્ષિણ તરફ આગળ વધે, તો અમે તૈયાર છીએ.'
લેસરની આ ઘટના ત્યારે બની જ્યારે રોયલ નેવીના એક ફ્રિગેટ અને RAF પોસાઇડન P-8 પ્લેન જહાજની દરેક ગતિવિધિને ટ્રેક કરવા માટે યાંતરનો પીછો કરી રહ્યા હતા. આ ઘટના છેલ્લા બે અઠવાડિયાની અંદર થઈ હોવાનું માનવામાં આવે છે.
ડાઉનિંગ સ્ટ્રીટ ખાતે યોજાયેલી ન્યૂઝ કૉન્ફરન્સમાં, ડિફેન્સ સેક્રેટરીએ જાહેરાત કરી કે તેમણે રોયલ નેવીના એન્ગેજમેન્ટના નિયમોમાં ફેરફાર કર્યા છે, જેનાથી હવે તે યાંતરનો વધુ નજીકથી પીછો કરી શકશે.
આ આરોપોના જવાબમાં, લંડનમાં આવેલા રશિયન દૂતાવાસે જણાવ્યું કે રશિયાનું કામ યુનાઇટેડ કિંગડમના હિતોને અસર કરતું નથી, કે તેનો હેતુ તેની સુરક્ષાને નબળી પાડવાનો નથી. રશિયાએ બ્રિટન દ્વારા મૂકવામાં આવેલા આ આરોપોને 'અનગણિત આરોપોની શ્રુંખલા' ગણાવી છે.
રશિયાએ વધુમાં કહ્યું કે, 'તેમને બ્રિટિશ અંડરવૉટર કમ્યુનિકેશનમાં કોઈ રસ નથી.' રશિયાએ બ્રિટનને ચેતવણી આપી કે તે એવા નુકસાનકારક પગલાં લેવાનું ટાળે, જે યુરોપ મહાદ્વીપમાં સંકટની પરિસ્થિતિને વધુ વકરાવે.