નવી દિલ્હી: ઝેલેન્સ્કીએ અમેરિકા સાથેની શાંતિ યોજનાના ડ્રાફ્ટને 'વ્યવહારુ' ગણાવી સ્વીકારવાના સંકેત આપ્યા છે. જોકે, રશિયાના કબજા હેઠળના વિસ્તારોનો મુદ્દો હજુ વણઉકેલ્યો છે. હવે આખી દુનિયાની નજર પુતિન પર છે, જેઓ યુક્રેનને મળનારી પશ્ચિમી સુરક્ષા ગેરંટી સામે વાંધો ઉઠાવી શકે છે. નાટોના જણાવ્યા મુજબ, આ સુરક્ષા પ્રસ્તાવ યુક્રેનિયન સેનાને સતત મજબૂત રાખવા પર કેન્દ્રિત હશે.

યુક્રેને શાંતિ યોજનાની સાથે સાથે પોતાની સુરક્ષા માટે આત્મનિર્ભર બનવાની દિશામાં મજબૂત કદમ ઉઠાવ્યા છે. મીડિયા અહેવાલો અનુસાર, યુક્રેન અત્યારે ગુપ્ત સ્થળોએ હથિયારોની ફેક્ટરીઓ ચલાવી રહ્યું છે, જ્યાં અત્યાધુનિક 'ફ્લેમિંગો' નામની સ્વદેશી ક્રૂઝ મિસાઇલ વિકસાવવામાં આવી રહી છે. આ મિસાઇલની પ્રહાર ક્ષમતા આશરે 3000 કિલોમીટર છે, જેની તુલના અમેરિકાની શક્તિશાળી ટૉમાહૉક મિસાઇલ સાથે કરવામાં આવે છે. આ મિસાઇલની સૌથી મોટી ખાસિયત એ છે કે તે રશિયાના ઊંડાણવાળા વિસ્તારોમાં સચોટ હુમલો કરવામાં સક્ષમ છે. નોંધનીય છે કે, અગાઉ અમેરિકાએ જ્યારે લાંબા અંતરની મિસાઇલ આપવાનો ઇન્કાર કર્યો હતો, ત્યારે તેના જવાબરૂપે યુક્રેને પોતાની આ સ્વદેશી ટૅક્નોલૉજી વિકસાવીને પોતાની સૈન્ય તાકાતનો પરચો આપ્યો છે.

યુક્રેન પ્રમુખ ઝેલેન્સ્કીના જણાવ્યા અનુસાર, યુક્રેન હવે પોતાની જરૂરિયાતના 50%થી વધુ હથિયારોનું ઉત્પાદન પોતે જ કરે છે. સોવિયેત સમયના જૂના હથિયારોને બદલે યુક્રેન હવે ડ્રોન, રોબોટિક સિસ્ટમ અને લાંબા અંતરની મિસાઇલમાં મોખરે છે. રશિયાની યુદ્ધ અર્થવ્યવસ્થાને નિશાન બનાવીને કરવામાં આવેલા લાંબા અંતરના હુમલાઓને કારણે મોસ્કોને આ વર્ષે 21 અબજ ડૉલરથી વધુનું નુકસાન થયું છે.