નવી દિલ્હી: Metaએ પોતાના પ્લેટફોર્મ્સ Facebook, WhatsApp અને Messenger પર નવા Scam Detection Tools લોન્ચ કરવાની જાહેરાત કરી છે. દુનિયાભરમાં વધતા ઓનલાઇન ફ્રોડ અને સ્કેમ નેટવર્ક્સ સામે લડવા માટે Meta દ્વારા આ પગલું લેવામાં આવ્યું છે. નવા ફીચર્સ યુઝર્સને શંકાસ્પદ પ્રવૃત્તિ અને જોખમી ઇન્ટરએક્શન અંગે અગાઉથી ચેતવણી આપશે, જેથી તેઓ સ્કેમનો ભોગ બનતા પહેલા સાવચેત થઈ શકે.

યુઝર પ્રોટેક્શન માટે નવા ટૂલ્સ

Metaના નવા ટૂલ્સ શંકાસ્પદ અથવા અસામાન્ય વર્તનને વહેલી તકે ઓળખી તેને ફ્લેગ કરવા માટે બનાવવામાં આવ્યા છે. આથી યુઝર્સ પોતે જે ચેટ અથવા તો ઇન્ટરએક્શન કરી રહ્યા હોય એને અટકાવી શકે. યુઝર્સને ખાસ કરીને શંકાસ્પદ ફ્રેન્ડ રિક્વેસ્ટ, ડિવાઇસ લિંકિંગ પ્રયાસો અથવા સ્કેમ મેસેજ જેવી પરિસ્થિતિઓમાં આ ફીચર મદદરૂપ થશે. કંપનીએ જણાવ્યું કે ઓનલાઇન ઠગો સતત પોતાની રીતો બદલતા રહે છે અને ઘણી વખત નજરમાંથી બચી કાર્ય કરવાનો પ્રયાસ કરે છે, તેથી આવી સુરક્ષા વ્યવસ્થાઓ જરૂરી બની છે.

આ અપડેટમાં WhatsAppના Device-Linking ફીચર માટે ખાસ એલર્ટ સિસ્ટમ ઉમેરવામાં આવી છે. હવે જો કોઈ વ્યક્તિ તમારા એકાઉન્ટને અન્ય ડિવાઇસ સાથે લિંક કરવાનો પ્રયાસ કરે અને તેમાં અસામાન્ય વર્તન જણાય તો યુઝરને તરત એલર્ટ મળશે. આ વોર્નિંગ મેસેજમાં રિક્વેસ્ટ કયા સ્થાનથી આવી રહી છે તેની માહિતી પણ દર્શાવવામાં આવશે, જેથી યુઝર તેને મંજૂરી આપતા પહેલા તેની વિશ્વસનીયતા ચકાસી શકે.

Metaએ જણાવ્યું કે સ્કેમર્સ ઘણી વખત સોશિયલ એન્જિનિયરિંગની રીતો અપનાવી લોકોને Device-Linking Codes શેર કરવા માટે લુભાવે છે. ઉદાહરણ તરીકે, કોઈ ટેલેન્ટ સ્પર્ધામાં મત આપવા કહેવામાં આવે છે અને વેબસાઇટ પર જઈ ફોન નંબર દાખલ કરવા કહેવામાં આવે છે. ત્યારબાદ WhatsApp પર મળેલા ડિવાઇસ લિંકિંગ કોડ શેર કરવા માટે કહેવામાં આવે છે. આ એલર્ટ સિસ્ટમનો હેતુ આવા સ્કેમ પ્રયાસોને સફળ થવા પહેલા જ રોકવાનો છે, ખાસ કરીને જ્યારે ઠગો કોઈનું એકાઉન્ટ કબજે કરવાનો પ્રયાસ કરે.

Meta Facebook પર પણ શંકાસ્પદ ફ્રેન્ડ રીક્વેસ્ટ ઓળખવા માટે નવા એલર્ટનું પરીક્ષણ કરી રહી છે. જો કોઈ યુઝરને એવી પ્રોફાઇલમાંથી રિક્વેસ્ટ મળે જેમાં અસામાન્ય સંકેતો હોય, જેમ કે ખૂબ ઓછા મ્યુચ્યુઅલ કનેક્શન અથવા અન્ય દેશમાં લોકેશન, તો યુઝરને આ માટે વોર્નિંગ નોટિફિકેશન મળશે. કંપનીને આશા છે કે આ એલર્ટ યુઝર્સને અજાણ્યા પ્રોફાઇલની રિક્વેસ્ટ સ્વીકારતા પહેલા વધુ સાવચેતી રાખવા પ્રોત્સાહિત કરશે.