નવી દિલ્હી: વોશિંગ્ટનથી લઈને તેહરાન સુધી અત્યારે યુદ્ધનો માહોલ ગરમાયો છે. અમેરિકી રાષ્ટ્રપતિ ડોનાલ્ડ ટ્રમ્પનું મહત્વનું સંબોધન જેવું પૂર્ણ થયું, તેના ગણતરીના મિનિટોમાં જ ઈરાને ઈઝરાયલ પર મિસાઈલોનો વરસાદ કરી દીધો છે. ઈઝરાયલનું મહત્વનું શહેર હાઈફા આ હુમલામાં મુખ્ય નિશાન બન્યું હોવાના અહેવાલો છે. ઈરાન તરફથી છોડવામાં આવેલી બેલેસ્ટિક મિસાઈલોએ હાઈફાના અનેક વિસ્તારોને હચમચાવી દીધા છે. ઈઝરાયલની 'આયર્ન ડોમ' એર ડિફેન્સ સિસ્ટમ સક્રિય થઈ હોવા છતાં, હુમલો એટલો તીવ્ર હતો કે અનેક જગ્યાએ નુકસાન થયું હોવાની આશંકા છે. ટ્રમ્પે પોતાના ભાષણમાં ઈરાનને કડક ચેતવણી આપી હતી, પરંતુ ઈરાને આ હુમલો કરીને સાબિત કરી દીધું છે કે તે કોઈ પણ દબાણ સામે ઝૂકવા તૈયાર નથી. હવે સમગ્ર વિશ્વની નજર ઈઝરાયલના વળતા પ્રહાર પર છે.

નોંધનીય છે કે, ટ્રમ્પે પોતાના સંબોધનમાં દાવો કર્યો હતો કે અમેરિકા અને ઈઝરાયલે ઈરાનની સૈન્ય તાકાતને લગભગ ખતમ કરી દીધી છે. તેમણે ચેતવણી આપી હતી કે, "અમે આગામી બે થી ત્રણ અઠવાડિયામાં તેમને અત્યંત આકરો જવાબ આપીશું અને તેમને પાષાણ યુગ (Stone Age) માં પાછા મોકલી દઈશું." ટ્રમ્પે એમ પણ કહ્યું હતું કે ઈરાનની નૌસેના અને વાયુસેના સંપૂર્ણપણે બરબાદ થઈ ગઈ છે.

પરંતુ, ટ્રમ્પના આ દાવાઓની થોડી જ મિનિટો બાદ થયેલા મિસાઈલ હુમલાઓ દર્શાવે છે કે જમીની હકીકત અલગ છે. ઈરાન હજુ પણ ઈઝરાયેલના ઠેકાણાઓ પર હુમલો કરવાની ક્ષમતા ધરાવે છે, જે અમેરિકી દાવાઓ સામે સવાલો ઉભા કરે છે.