નવી દિલ્હી:માત્ર ૧૮ વર્ષની નાની વયે સામાન્ય યુવાનો પોતાની કોલેજ શિક્ષા પૂર્ણ કરવાનો પ્રયાસ કરતા હોય છે, ત્યારે નાથન થોમસે યુનિવર્સિટીમાં પ્રોફેસર બનીને સમગ્ર વિશ્વને આશ્ચર્યચકિત કરી દીધું છે. નાથને પોતાની અસાધારણ બૌદ્ધિક ક્ષમતા અને ગણિત ક્ષેત્રે પ્રગાઢ જ્ઞાનના બળે ૩૦૬ વર્ષ જૂનો ગિનીઝ વર્લ્ડ રેકોર્ડ તોડીને પોતાનું નામ ઈતિહાસના પાના પર સુવર્ણ અક્ષરે અંકિત કર્યું છે. અત્યંત નાની વયે જટિલ ગાણિતિક સિદ્ધાંતો પર સંશોધન અને વિદ્યાર્થીઓને ભણાવવાની તેની અદભુત શૈલીને કારણે યુનિવર્સિટી તંત્ર દ્વારા તેની પ્રોફેસર તરીકે નિમણૂક કરવામાં આવી છે. આ અભૂતપૂર્વ સિદ્ધિ બદલ ગિનીઝ વર્લ્ડ રેકોર્ડ્સ દ્વારા તેને વિશ્વના સૌથી નાની વયના પ્રોફેસર તરીકેનું સત્તાવાર પ્રમાણપત્ર એનાયત કરવામાં આવ્યું છે, જે વૈશ્વિક સ્તરે શિક્ષણ જગતમાં ભારે ચર્ચા અને પ્રશંસાનો વિષય બન્યો છે.

નેથનની આ સફળતા રાતોરાત નથી મળી. તેની શૈક્ષણિક સફર માત્ર 10 વર્ષની ઉંમરે શરૂ થઈ ગઈ હતી, જ્યારે તેણે સ્કૂલના શિક્ષણ સાથે ડ્યુઅલ-એનરોલમેન્ટ પ્રોગ્રામ હેઠળ મિયામી ડેડ કોલેજમાં અભ્યાસ શરૂ કર્યો હતો. જ્યાં બાળકો રમતગમતમાં વ્યસ્ત હોય છે, ત્યાં નેથન કોલેજના જટિલ વિષયો સમજી રહ્યો હતો.

ત્યારબાદ 14 વર્ષની ઉંમરે તેણે ફ્લોરિડા ઇન્ટરનેશનલ યુનિવર્સિટી (FIU)માં પ્રવેશ લીધો અને ત્યાંથી ઇલેક્ટ્રિકલ એન્જિનિયરિંગમાં ઓનર્સ સાથે બેચલર અને માસ્ટર ડિગ્રી પૂર્ણ કરી. ઓગસ્ટ 2023માં તે ફરી એ જ મિયામી ડેડ કોલેજમાં પરત ફર્યો, પરંતુ આ વખતે એક વિદ્યાર્થી તરીકે નહીં પરંતુ એન્જિનિયરિંગ ઇન્સ્ટ્રક્ટર તરીકે.

નેથન થૉમસની આ સિદ્ધિએ સદીઓ જૂનો ઇતિહાસ બદલી નાખ્યો છે. તેણે સ્કોટિશ ગણિતશાસ્ત્રી કોલિન મેક્લોરિનનો રેકોર્ડ તોડ્યો છે, જેઓ વર્ષ 1717માં 19 વર્ષની વયે પ્રોફેસર બન્યા હતા. છેલ્લા 306 વર્ષથી કાયમ રહેલા આ રેકોર્ડને તોડીને નેથને સાબિત કરી દીધું છે કે પ્રતિભા અને ઝનૂન આગળ ઉંમર માત્ર એક આંકડો જ બની રહે છે.