નવી દિલ્હી: બજારમાં અત્યારે ફળોની સિઝન જામી છે, ત્યારે ફળ ખરીદતી વખતે ગ્રાહકો અવારનવાર છેતરાઈ જતા હોય છે. ખાસ કરીને દાડમ ખરીદવામાં લોકો સૌથી વધુ થાપ ખાઈ જાય છે. બહારથી એકદમ ચમકતું અને લાલ દેખાતું દાડમ અંદરથી તદ્દન ફીકું કે કાચું નીકળે ત્યારે પૈસા માથે પડે છે. ફ્રૂટ માર્કેટના નિષ્ણાતો અને અનુભવી વેપારીઓના મતે, સારો માલ ઓળખવા માટે માત્ર રંગ નહીં, પણ ફળની બનાવટ અને વજન જોવું બહુ જરૂરી છે.
સામાન્ય રીતે સારું અને પાકેલું દાડમ ઘેરા લાલ અથવા લાલ-બ્રાઉન રંગનું હોય છે. જો રંગ ફીકો દેખાય, તો સમજી લેવું કે તે હજી પૂરી રીતે પાક્યું નથી. આ ઉપરાંત, દાડમ હંમેશા વજનમાં ભારે હોવું જોઈએ. જો દાડમ તેના કદના પ્રમાણમાં હળવું લાગે, તો તે અંદરથી સૂકું હોઈ શકે છે. ભારે દાડમમાં રસ અને પાણીનું પ્રમાણ વધુ હોય છે, જેનાથી તેના દાણા તાજા અને લાલ નીકળે છે.
લોકો અવારનવાર એકદમ ગોળ દાડમ પસંદ કરતા હોય છે, પરંતુ તે સ્વાદમાં ફીકા હોઈ શકે છે. હંમેશા થોડા ચોરસ કે ખૂણાવાળા આકારના દાડમ પસંદ કરવા જોઈએ. જ્યારે દાડમ પૂરી રીતે પાકી જાય છે, ત્યારે તેના દાણા અંદરથી દબાણ કરે છે, જેનાથી તેનો આકાર થોડો કોણીય બની જાય છે. સાથે જ, પાકેલા દાડમની છાલ થોડી સખત અને ટાઈટ હોય છે. જો છાલ નરમ કે કરચલીવાળી હોય, તો તે ખરાબ હોઈ શકે છે.
જો તમે પણ બજારમાં દાડમ ખરીદવા જઈ રહ્યા છો, તો આ સરળ ટિપ્સ હંમેશા યાદ રાખો:
 ૧. ગોળાકાર નહીં, ખૂણાવાળા દાડમ પસંદ કરો: જે દાડમ એકદમ પરફેક્ટ ગોળ હોય તે અંદરથી કાચા હોવાની શક્યતા વધુ છે. જે દાડમની સપાટી પર થોડા ખૂણા (ચોરસ કે ષટ્કોણ જેવો આકાર) દેખાય, તે અંદરથી પૂરેપૂરું પાકી ગયું હોવાની નિશાની છે, કારણ કે અંદરના દાણા મોટા થતાં તે બહારની છાલને દબાવે છે.
૨. વજન ચેક કરો: સરખા કદના બે દાડમ હાથમાં લો, જે દાડમ વજનમાં વધુ ભારે લાગે તે જ ખરીદવું. ભારે દાડમનો અર્થ એ છે કે તેની અંદરના દાણા રસથી ભરપૂર છે.
૩. છાલ પર નજર કરો: દાડમની છાલ એકદમ સોફ્ટ અને પાતળી હોવી જોઈએ. જો છાલ બહુ કડક કે લાકડા જેવી હશે તો અંદરના દાણા સુકાઈ ગયેલા હોઈ શકે છે.