નવી દિલ્હી: ચીનના એક મોટા ઓદ્યોગિક વિસ્તારમાં આવેલી ફટાકડા બનાવવાની ફેક્ટરીમાં આજે વહેલી સવારે ભીષણ આગ ફાટી નીકળતા રણસંગ્રામ જેવી સ્થિતિ સર્જાઈ હતી. વિસ્ફોટ એટલો પ્રચંડ હતો કે ગણતરીની મિનિટોમાં આખી ફેક્ટરી રાખના ઢગલામાં ફેરવાઈ ગઈ હતી. આ દુર્ઘટનામાં અત્યાર સુધીમાં ૨૧ લોકોના કરૂણ મોત નિપજ્યા છે, જ્યારે ૬૦થી વધુ શ્રમિકો ગંભીર રીતે દાઝી જતાં તેમને સારવાર અર્થે ખસેડાયા છે.
મધ્ય ચીન સ્થિત આ લી-યુ-યાંગ શહેરમાં આવેલી આ હ્યુ-યા-શેંગ ફાયર વર્કસ મેન્યુફેકચરીંગ એન્ડ ડીસપ્લે કંપની ફટાકડા બનાવનાર મોટી કંપનીઓ પૈકીની એક છે. તેના ગોડાઉનના બે ખંડોમાં અત્યારે ફટાકડા બનાવવા માટેનો કાચો-દારૂગોળો પડેલો છે. પરંતુ સદનસીબે તે ખંડો સુધી આગ પ્રસરી ન હતી.
આ માહિતી આપતા ચીનની સત્તાવાર સરકારી સમાચાર સંસ્થા શીન-હુઆ જણાવે છે કે, આ વિસ્ફોટ પછી ધૂમાડાના ગોટા ઉડતા દૂર દૂર સુધી દેખાતા હતા. ધડાકો એટલો પ્રચંડ હતો કે આજુબાજુનાં ગામોનાં મકાનોનાં બારી-બારણાનાં કાચ પણ તૂટી ગયા હતા.