નવી દિલ્હી: આંતરરાષ્ટ્રીય રાજનીતિ અને સામાજિક સમીકરણોને ગરમાવી દેતા એક બહુ જ મોટા સમાચાર વૈશ્વિક મીડિયામાંથી સામે આવ્યા છે. ગ્લોબલ ડેમોગ્રાફિક ઓડિટ, ઇન્ટરનેશનલ સિક્યોરિટી વિંગ એન્ડ સોશિયો-પોલિટિકલ અફેર્સ ડેસ્ક રિપોર્ટ મુજબ, એક મોટા દેશે રાષ્ટ્રીય સુરક્ષા અને સમાન નાગરિક ધારાના ભાગરૂપે ધાર્મિક પ્રથાઓ પર કાયદાનો સિકંજો વધુ મજબૂત કર્યો છે. અગાઉ જાહેર સ્થળો પર ફેસ-વેઇલ એટલે કે બુરખા કે નકાબ પર સંપૂર્ણ પ્રતિબંધ મૂક્યા બાદ, હવે ત્યાંની મસ્જિદોમાં લાઉડસ્પીકર દ્વારા થતા ધ્વનિ પ્રદૂષણ અને અઝાનના અવાજ પર રોક લગાવવાની દરખાસ્ત મૂકવામાં આવી છે.

સોશિયલ ડેમોક્રેટ્સ પાર્ટીના નેતા મોર્ટેન બોડસ્કોવે ડેનિશજણાવ્યું કે, ડેનમાર્કમાં વધતું ઇસ્લામાઇઝેશન સાર્વજનિક સ્થળો પર વધુ પડતી જગ્યા રોકી રહ્યું છે. તેમણે સ્પષ્ટ શબ્દોમાં કહ્યું, "અઝાનનો અવાજ ડેનમાર્કના ધાબા પરથી સંભળાવો જોઈએ નહીં. ડેનમાર્કમાં તેનું કોઈ સ્થાન નથી, અને જ્યારે તમે ડેનમાર્કમાં ચાલતા હોવ ત્યારે તમને કોઈ શંકા ન હોવી જોઈએ કે તમે ઇસ્લામાબાદના કોઈ સબર્બમાં આવી ગયા છો." ઉલ્લેખનીય છે કે ડેનમાર્કની કુલ વસ્તીમાં મુસ્લિમો આશરે 5 ટકા છે. જે ત્યાંની સૌથી મોટી લઘુમતી કોમ્યુનિટી છે. વડાપ્રધાન મેટ્ટે ફ્રેડરિકસનની આગેવાની હેઠળ ડેનમાર્ક હાલમાં યુરોપની સૌથી કડક ઇમિગ્રેશન પોલિસી ચલાવી રહ્યું છે.

આ પહેલા પણ ડેનમાર્કે સાર્વજનિક સ્થળોએ ઇસ્લામિક બુરખા અને ફેસ-વેઇલ પર પ્રતિબંધ મૂકતો કાયદો પસાર કર્યો હતો. આ ઉપરાંત, સરકારે તમામ શૈક્ષણિક સંસ્થાઓને તેમના પરિસરમાંથી નમાઝ પઢવા માટેના પ્રાર્થના રૂમ હટાવવાનો પણ આદેશ આપ્યો છે. ડેનમાર્કમાં અઝાન પર પ્રતિબંધ મૂકવાનો આ પ્રયાસ નવો નથી. આ અગાઉ વર્ષ 2020 અને 2025 માં પણ અઝાન પર પ્રતિબંધ મૂકવાનો કાયદો લાવવાનો પ્રયત્ન કરાયો હતો, પરંતુ તે સમયે પ્રસ્તાવ સંસદ સુધી પહોંચી શક્યો ન હતો.

હાલમાં પણ કોપનહેગન જેવા શહેરોમાં કડક નોઇઝ રેગ્યુલેશનના કારણે મસ્જિદો લાઉડસ્પીકર પર અઝાન પઢી શકાતી નથી. જો કે, દેશવ્યાપી સ્તરે સંપૂર્ણ પ્રતિબંધ મૂકવાથી કાનૂની પડકારો આવી શકે છે, કારણ કે ડેનમાર્કનું બંધારણ ધાર્મિક સ્વતંત્રતા અને જાહેર પૂજાનો અધિકાર આપે છે. મંત્રી બોડસ્કોવે જણાવ્યું કે સરકાર પહેલા એ તપાસ કરશે કે ધાર્મિક સ્વતંત્રતાની બંધારણીય સુરક્ષાને નુકસાન પહોંચાડ્યા વિના આખા દેશમાં અઝાન પર કાયદેસર પ્રતિબંધ કેવી રીતે લગાવી શકાય. બીજી તરફ, ટીકાકારોનું કહેવું છે કે આ પ્રસ્તાવ માત્ર એક જ ધર્મને નિશાન બનાવે છે અને તે ધાર્મિક સ્વતંત્રતાનું ઉલ્લંઘન છે.