નવી દિલ્હી: પાકિસ્તાનના ખૈબર પખ્તુનખ્વા પ્રાંતના હરિપુર જિલ્લામાં આવેલી હત્તાર ઈન્ડસ્ટ્રીયલ એસ્ટેટમાં ગઈકાલે સાંજે ગેસની મુખ્ય પાઈપલાઈન પ્રચંડ ધડાકા સાથે ફાટતા ભારે તબાહી મચી છે. ૧૬ ઈંચની ડાયામીટર ધરાવતી આ પાઈપલાઈનમાં થયેલા બ્લાસ્ટ બાદ આકાશમાં આગના ગોળા ઉછળ્યા હતા અને જોતજોતામાં આગે આસપાસના રહેણાંક મકાનોને પોતાની લપેટમાં લઈ લીધા હતા.
આ કરુણ ઘટનામાં ૭ બાળકો અને એક મહિલા સહિત કુલ ૮ લોકોના મોત નીપજ્યા છે. અધિકારીઓના જણાવ્યા અનુસાર, મોટાભાગના મોત ગૂંગળામણના કારણે થયા છે. આગ એટલી ભયાનક હતી કે બચાવ ટીમોને તેના પર કાબૂ મેળવતા કલાકો લાગ્યા હતા. ૧૧થી વધુ લોકો ગંભીર રીતે દાઝી ગયા છે જેમને હોસ્પિટલમાં ખસેડવામાં આવ્યા છે. પાકિસ્તાનમાં જર્જરિત ઈન્ફ્રાસ્ટ્રક્ચરને કારણે અવારનવાર સર્જાતી આવી હોનારતોએ ફરી એકવાર માસૂમોનો ભોગ લીધો છે.