નવી દિલ્હી: દુનિયાના સૌથી અમીર શાસકોમાં જે મેળવણી થાય છે તેવા દુબઈના શેખ મોહમ્મદ બિન રશીદ અલ મકતુમ ફરી એકવાર બ્રિટિશ મીડિયામાં હેડલાઇન્સ બની રહ્યા છે. બ્રિટનના સરે વિસ્તારમાં શેખ લાંબો સમય વિતાવે છે, જ્યાં તેમની માલિકીનું લોન્ગક્રોસ એસ્ટેટ (Longcross Estate) આવેલું છે. આ એસ્ટેટ એટલું મોટું છે કે તેના પરિસરમાં જંગલો, હેલીપેડ અને અદભુત બગીચાઓ આવેલા છે. મહેલમાં ૨૦ થી વધુ આલીશાન બેડરૂમ્સ છે, છતાં જ્યારે શેખ પોતાની ત્રણ પત્નીઓ, સંતાનો અને અસંખ્ય નોકર-ચાકરોના કાફલા સાથે અહીં આવે છે ત્યારે મહેલ સાંકડો પડે છે.

આશરે 1.6 લાખ કરોડ રૂપિયા ($19.7 બિલિયન) થી વધુની અઢળક સંપત્તિના માલિક શેખ મોહમ્મદે બે દાયકા પહેલાં કરોડો રૂપિયા ખર્ચીને સ્કોટલેન્ડમાં આ પ્રોપર્ટી ખરીદી હતી. શેખ મોહમ્મદનો શાહી કાફલો એટલો મોટો છે કે તેમાં તેમની પત્નીઓ, 30 બાળકો, નજીકના સંબંધીઓ, અંગરક્ષકો અને ખાસ સ્ટાફની આખી ફોજ સામેલ હોય છે. આ ભારેખમ લશ્કરને કારણે જગ્યા ટૂંકી પડતી હોવાથી શેખ છેલ્લા 20 વર્ષમાં અહીં માત્ર 5 વખત જ આવી શક્યા છે.

આ વિશાળ એસ્ટેટમાં અગાઉથી જ 14 બેડરૂમનું હોલિડે હોમ, સ્વિમિંગ પૂલ અને જિમ ધરાવતી 16 બેડરૂમની શિકાર લોજ, એક કોટેજ અને સ્ટાફ ક્વાર્ટર આવેલા હતા. છતાં આ વિશાળ પરિવાર માટે તે અપૂરતું હોવાથી તાજેતરમાં જ વધુ એક 15 બેડરૂમની નવી લક્ઝરી ગેસ્ટ લોજ બનાવવાની મંજૂરી મેળવવામાં આવી છે, જેનાથી હવે કુલ બેડરૂમની સંખ્યા 58 થી વધુ થઈ જશે. લોચ ડુઇચ તળાવના સુંદર કિનારે બની રહેલી આ લોજમાં આલીશાન ડાઇનિંગ હોલ અને લિવિંગ રૂમ બનાવવામાં આવ્યા છે. સ્થાનિક લોકોનું કહેવું છે કે આ આખું બાંધકામ હવે એક ‘નાનકડા ગામ’ જેવું દેખાઈ રહ્યું છે, જો કે સ્થાનિક ચર્ચ અને પર્યાવરણ જૂથો દ્વારા આ બાંધકામનો ભારે વિરોધ પણ કરવામાં આવી રહ્યો છે.

શેખ મોહમ્મદ બિન રાશિદ અલ મક્તૂમને વિશ્વના સૌથી મોટા રિયલ એસ્ટેટ ડેવલપર્સમાંના એક ગણવામાં આવે છે. તેમના નેતૃત્વમાં જ દુબઈએ વિશ્વની સૌથી ઊંચી ઈમારત ‘બુર્જ ખલીફા’, વિશ્વનું સૌથી મોટું શોપિંગ સેન્ટર ‘દુબઈ મોલ’ અને ‘દુબઈ મેટ્રો’ મેળવ્યા છે. આ સિવાય બ્રિટિશ મીડિયાના અહેવાલો અનુસાર, શેખ બ્રિટનના સૌથી મોટા જમીન માલિકોમાંના એક છે, જેમની પાસે માત્ર યુકે (UK) માં જ 1,00,000 એકરથી વધુ જમીન અને અંદાજે 1,000 કરોડ રૂપિયાથી વધુની રિયલ એસ્ટેટ પ્રોપર્ટી છે. આ ઉપરાંત રોમમાં પણ ઘણી બધી આલીશાન મિલકતો તેમના નામે નોંધાયેલી છે.