નવી દિલ્હી:આપણા ઘરના રસોડામાં શાનથી શોભતું ફ્રિજ (Refrigerator) અને તેની ઉપરનો ભાગ ઘણીવાર જગ્યાના અભાવે સ્ટોરેજ રૂમ બની જતો હોય છે, પરંતુ આ નાની ભૂલ ગૃહિણીઓ અને પરિવાર માટે અત્યંત ઘાતક સાબિત થઈ શકે છે. ફ્રિજની બનાવટ અને તેની ટેક્નોલોજી એવી હોય છે કે તે પાછળ કે ઉપરના ભાગેથી ગરમી (Heat) બહાર ફેંકે છે. આવા સંજોગોમાં ફ્રિજની ઉપર અજાણતા પણ કેટલીક વસ્તુઓ મૂકવાથી મોટો ભડાકો થવાની અથવા સામાન બગડી જવાની દહેશત રહેલી છે. જો તમારા પણ ફ્રિજ ઉપર આ ૫ વસ્તુઓ પડી હોય, તો આજે જ તેને હટાવી દેજો, નહીંતર મોટું નુકસાન થતા વાર નહીં લાગે:
ખાવાનું તેલ અને મસાલા
રસોઈનું તેલ અને મસાલા ક્યારેય ફ્રિજ ઉપર ન રાખવા જોઈએ. ખાસ કરીને પારદર્શક બોટલોમાં રાખેલું તેલ ગરમી અને પ્રકાશના સંપર્કમાં આવવાથી બગડી શકે છે. તેમજ ગરમીના લીધે મસાલાનો સ્વાદ અને સુગંધ પણ ઉડી જાય છે.
સીરિયલ, બ્રેડ અને ચિપ્સ-નમકીન
ફ્રિજ ઉપર રાખેલી બ્રેડ અને સીરિયલ ગરમીના કારણે જલ્દી નરમ પડી જાય છે અને તેમનો ક્રિસ્પી ટેક્સચર ખતમ થઈ જાય છે. આ ઉપરાંત, પૅકેટમાં ભેજ જમા થવાથી બ્રેડમાં ફૂગ લાગવાનું જોખમ વધી જાય છે. તેવી જ રીતે, ચિપ્સ અને કુરકુરે જેવા સ્નેક્સ પણ ગરમીથી સોફ્ટ થઈ શકે છે અને તેનો સ્વાદ બગડી શકે છે.
સફાઈનો સામાન અને દવાઓ
કિચન ક્લીનર કે અન્ય સફાઈના પ્રોડક્ટ્સને બાળકોની પહોંચથી દૂર રાખવાના હોય છે, પરંતુ ફ્રિજની ઉપરનો ભાગ તેના માટે યોગ્ય જગ્યા નથી. તેને હંમેશાં હવાઉજાસવાળી અને ઠંડી જગ્યાએ રાખવા જોઈએ. આ જ રીતે, દવાઓને પણ નિશ્ચિત તાપમાનની જરૂર હોય છે, તેથી ગરમીના કારણે દવાઓની અસર ઓછી થઈ શકે છે.

પ્લાસ્ટિકના ડબ્બા અને ભારે સામાન
પ્લાસ્ટિકના કન્ટેનર સતત ગરમીના સંપર્કમાં રહેવાથી જલ્દી નબળા પડી જાય છે, જેનાથી તે તૂટી કે વળી શકે છે. વળી, ફ્રિજ ઉપર ખૂબ ભારે સામાન મૂકવાથી ફ્રિજ પર દબાણ આવે છે અને વસ્તુઓ નીચે પડીને કોઈને ઈજા પણ પહોંચાડી શકે છે.
મીણબતી, બાકસ અને ઇલેક્ટ્રિક ઉપકરણો
મીણબતી, લાઈટર અને બાકસ જેવી જ્વલનશીલ વસ્તુઓને ફ્રિજ પર રાખવી ખૂબ જ જોખમી સાબિત થઈ શકે છે, કારણ કે ફ્રિજની ગરમીથી આગ લાગવાનું જોખમ રહે છે. આ ઉપરાંત, માઈક્રોવેવ કે ટોસ્ટર જેવા નાના ઉપકરણો પણ ફ્રિજ ઉપર ન રાખવા જોઈએ, કારણ કે બંનેની ગરમી મળીને ફ્રિજની લાઈફ ટૂંકી કરી શકે છે.