નવી દિલ્હી: વૈશ્વિક સ્તરે ચાલી રહેલા રશિયા-યુક્રેન મહાયુદ્ધે ફરી એકવાર અત્યંત રૌદ્ર અને લોહિયાળ સ્વરૂપ ધારણ કર્યું છે. રશિયન સેનાએ યુક્રેનના પ્રમુખ શહેરો અને રહેણાંક વિસ્તારોને નિશાન બનાવીને શ્રેણીબદ્ધ મિસાઈલ અને ડ્રોન હુમલા કર્યા છે. આ ઘાતક બોમ્બમારામાં અનેક બહુમાળી ઇમારતો પળભરમાં જમીનદોસ્ત થઈ ગઈ છે. હુમલાની તીવ્રતા એટલી ભયાનક હતી કે જ્યારે આકાશમાંથી કાળ વરસતો હતો, ત્યારે રસ્તા પર જતા અને ઘરોમાં રહેતા સામાન્ય નાગરિકો જીવ હથેળીમાં લઈને નજીકના અંડરગ્રાઉન્ડ સબવે અને મેટ્રો સ્ટેશનો તરફ દોડ્યા હતા અને ત્યાં ભયના ઓથાર નીચે છુપાઈ જવા મજબૂર બન્યા હતા.

દક્ષિણ-પૂર્વના આ શહેરમાં રશિયન હુમલામાં 5 લોકોના મોત થયા છે અને 25 લોકો ઘાયલ થયા છે. અહીં રહેણાંક મકાનો અને બાળકોના પ્લે-ગ્રાઉન્ડને ભારે નુકસાન થયું છે.

યુક્રેનના પાટનગર કિવમાં 4 લોકોના મોત થયા છે અને 51 લોકો ઈજાગ્રસ્ત થયા છે. મિસાઈલ હુમલાને કારણે 24 માળની બિલ્ડિંગનો કેટલોક ભાગ ધરાશાયી થયો છે, જેમાં લોકો કાટમાળ નીચે દબાયા હોવાની આશંકા છે. કિવના ઓબોલોન જિલ્લામાં પણ મિસાઈલના કાટમાળ પડવાથી ગાડીઓ સળગી ગઈ છે.

યુક્રેનના પ્રમુખ ઝેલેન્સકીએ અગાઉ જ મોટા હુમલાની ચેતવણી આપી હતી. રશિયાએ ગયા અઠવાડિયે જ યુક્રેનની સૈન્ય અને મહત્વની જગ્યાઓને નિશાન બનાવવાની ધમકી આપી હતી. બીજી તરફ, રશિયાના ક્રાસ્નોદાર વિસ્તારમાં આવેલી ઇલસ્કી ઓઇલ રિફાઇનરી પર પણ ડ્રોન હુમલો થયો હોવાના અહેવાલ છે, જે યુદ્ધની વધતી જતી તીવ્રતા દર્શાવે છે.

કિવમાં હજારો લોકોએ સુરક્ષા માટે સબવે સ્ટેશનોમાં આશરો લીધો છે. યુદ્ધ હવે ચાર વર્ષથી વધુ સમયથી ચાલી રહ્યું છે, અને બંને પક્ષો એકબીજાની પાવર સપ્લાય અને ઓઇલ ફેસિલિટીઝને સતત નિશાન બનાવી રહ્યા છે. અમેરિકામાં ડોનાલ્ડ ટ્રમ્પનું વહીવટીતંત્ર હાલમાં મધ્ય-પૂર્વના સંઘર્ષો પર વધુ ધ્યાન કેન્દ્રિત કરી રહ્યું હોવાથી યુક્રેન યુદ્ધના અંતની આશાઓ હાલ તો ક્ષીણ દેખાઈ રહી છે.