નવી દિલ્હી: બ્રહ્માંડમાં ભમતો એક મહાકાય પથ્થર એટલે કે એસ્ટેરોઇડ પૃથ્વી તરફ ખૂબ જ ઝડપથી આગળ વધી રહ્યો છે. આ એસ્ટેરોઇડનું કદ એટલું વિશાળ છે કે જો તે પૃથ્વીના વાતાવરણમાં પ્રવેશીને કોઈ શહેર પર ત્રાટકે, તો ગણતરીની મિનિટોમાં આખું શહેર નકશા પરથી સાફ થઈ શકે છે. સૌથી ચોંકાવનારી વાત એ છે કે આ એસ્ટેરોઇડ પૃથ્વી અને ચંદ્ર વચ્ચેના અંતર કરતાં પણ વધુ નજીકથી પસાર થવાનો છે.

એસ્ટેરોઇડ પથ્થરના ટુકડાઓ હોય છે જે સૂર્યની આસપાસ ચક્કર લગાવતા રહે છે. કેટલાક મોટા હોય છે તો કેટલાક નાના. તેમને નાના ગ્રહો પણ કહેવામાં આવે છે. મોટાભાગના એસ્ટેરોઇડ મંગળ અને ગુરુ ગ્રહ વચ્ચે આવેલી પટ્ટીમાં રહે છે. જોકે કેટલાક એસ્ટેરોઇડ પોતાની કક્ષા બદલીને પૃથ્વીના નજીક આવી જાય છે. તેમને Near-Earth Objects કહેવામાં આવે છે. 2026 JH2 પણ એ જ પ્રકારનો એક એસ્ટેરોઇડ છે. આ Apollo Classનો એસ્ટેરોઇડ છે, એટલે કે તેની કક્ષા પૃથ્વીની કક્ષાને પાર કરે છે.

આ એસ્ટેરોઇડ થોડા દિવસો પહેલાં જ શોધાયો છે. અમેરિકાના કેનસાસ અને એરિઝોનાની સ્પેસ ઓબ્ઝર્વેટરીના વૈજ્ઞાનિકોએ તેને જોયો હતો. અત્યાર સુધી તેને માત્ર 24 વખત ટ્રેક કરવામાં આવ્યો છે. તેથી વૈજ્ઞાનિકો તેના કદ, ગતિ અને માર્ગને વધુ સારી રીતે સમજવાનો પ્રયાસ કરી રહ્યા છે.

આ એસ્ટેરોઇડ પૃથ્વીથી માત્ર 90,917 કિલોમીટરની દૂરીથી પસાર થશે. આ અંતર ચંદ્ર સુધીની દૂરીના લગભગ ચોથા ભાગ જેટલું છે. ચંદ્ર પૃથ્વીથી અંદાજે 3,84,000 કિલોમીટર દૂર છે. એટલે કે આ એસ્ટેરોઇડ ચંદ્રની સરખામણીએ ઘણો વધારે નજીક આવશે. ખગોળશાસ્ત્રી માર્ક નૉરિસ કહે છે કે એટલી નજીકથી પસાર થવું અને અથડાયા વગર નીકળી જવું ખૂબ જ નજીકનું અંતર માનવામાં આવે છે. જોકે 90,000 કિલોમીટર હજુ પણ સુરક્ષિત અંતર છે અને અથડામણની કોઈ શક્યતા નથી.