નવી દિલ્હી: વૈશ્વિક સ્તરે ઇન્ફ્રાસ્ટ્રક્ચર અને ટેકનોલોજીના ક્ષેત્રે એક નવો ઇતિહાસ રચાયો છે, જેમાં દુનિયાનું સૌથી ભવ્ય અને વિશાળ કહી શકાય તેવું એરપોર્ટ આખરે પ્રવાસીઓ માટે ખુલ્લું મૂકી દેવામાં આવ્યું છે. આ એરપોર્ટનો વ્યાપ અને તેની ભવ્યતા એટલી ભયાનક છે કે તે ૭૮૦ ચોરસ કિલોમીટર જેટલા મસમોટા વિસ્તારમાં ફેલાયેલું છે, જે ભારતના મેગા સિટી અમદાવાદના ભૌગોલિક વિસ્તાર કરતાં પણ મોટું માનવામાં આવે છે. આ પ્રોજેક્ટને સાકાર કરવા માટે એન્જિનિયરો અને શ્રમિકોએ રાત-દિવસ એક કરીને પૂરા ૧૬ વર્ષ સુધી કડક મહેનત કરી છે અને તેના નિર્માણ પાછળ છેક ૧૯,૦૦૦ કરોડ રૂપિયાનો મસમોટો ધુમાડો કરવામાં આવ્યો છે.
સાઉદી અરેબિયાના દમ્મામ શહેરમાં આવેલું ‘કિંગ ફહદ આંતરરાષ્ટ્રીય એરપોર્ટ’ (King Fahd International Airport) વિશ્વનું સૌથી મોટું એરપોર્ટ છે. આ એરપોર્ટ કુલ 780 ચોરસ કિલોમીટરના વિશાળ ક્ષેત્રફળમાં ફેલાયેલું છે. આ આંકડો કેટલો મોટો છે તેની કલ્પના તમે એ વાત પરથી કરી શકો છો કે, આ એરપોર્ટ આપણા અમદાવાદ (505 ચોરસ કિ.મી.) અને મુંબઈ (603 ચોરસ કિ.મી.) કરતા પણ મોટું છે. ઐતિહાસિક શહેર આગ્રાનો કુલ વિસ્તાર માત્ર 121 ચોરસ કિ.મી. છે, એટલે કે આ એરપોર્ટ આગ્રા શહેર કરતાં આશરે 6 ગણું મોટું છે! એટલું જ નહીં, અમેરિકાનું સૌથી મોટું આર્થિક કેન્દ્ર ગણાતું ન્યૂ યોર્ક શહેર પણ 778.2 ચોરસ કિ.મી.ના વિસ્તાર સાથે આ એરપોર્ટ કરતાં કદમાં નાનું છે.
રસપ્રદ વાત એ છે કે આ એરપોર્ટના કુલ વિસ્તારમાંથી મુખ્ય એરપોર્ટ બિલ્ડિંગ માત્ર 36.8 ચોરસ કિમી વિસ્તાર રોકે છે. બાકીની વિશાળ જમીન એરપોર્ટ સત્તામંડળ હસ્તક છે, જેનો ઉપયોગ ભવિષ્યના વિસ્તરણ અને વિશિષ્ટ સુવિધા માટે કરાયો છે. આ એરપોર્ટમાં ત્રણ ટર્મિનલ કાર્યરત છે. 6 માળના અત્યાધુનિક ‘પેસેન્જર ટર્મિનલ’ ઉપરાંત, સાઉદી અરેબિયાની રાષ્ટ્રીય ઓઈલ કંપની માટે એક ખાસ 'અરામકો ટર્મિનલ' અને વીઆઈપી મહેમાનો માટે એક વૈભવી 'રોયલ પેવેલિયન' પણ અહીં ઉપલબ્ધ છે. ફ્લાઇટ્સની અવરજવર સરળ રહે તે માટે અહીં 4 કિ.મી. લાંબા અને 60 મીટર પહોળા એવા 2 સમાંતર રનવે છે.