લખનૌ, તા.29: ઉત્તર પ્રદેશની રાજધાની લખનૌના સૌથી પોશ ગણાતા 'સુશાંત ગોલ્ફ સિટી' હાઇ-ટેક ટાઉનશીપ પ્રોજેક્ટમાં ૧,૦૦૦ કરોડ રૂપિયાથી વધુના જમીન કૌભાંડને લઈને યોગી આદિત્યનાથ સરકારે લાલ આંખ કરી છે. કન્સોર્ટિયમના નિયમોનો ખુલ્લેઆમ ભંગ કરીને ગેરકાયદેસર રીતે કીમતી જમીન પચાવી પાડનારા ૮૪૬ પ્રભાવશાળી લોકો સામે સરકારે આરપારની લડાઈ શરૂ કરી દીધી છે. ગૃહનિર્માણ વિભાગના મુખ્ય સચિવ પી. ગુરુપ્રસાદે સ્પષ્ટ આદેશ જારી કરીને આ તમામ ૮૪૬ મોટા પ્લોટોના ફાળવણી પત્રો અને રજિસ્ટ્રી (ડીડ) રદ કરવાની કાનૂની પ્રક્રિયા શરૂ કરી દીધી છે. સૌથી મહત્વની વાત એ છે કે આ રજિસ્ટ્રેશન રદ થયા બાદ કોઈપણ ખરીદદારને એક પણ રૂપિયો વળતર આપવામાં આવશે નહીં.

IAS, પૂર્વ અમલદારો અને રાજકારણીઓની ઊંઘ હરામ

રજિસ્ટ્રેશન રદ થવાની યાદીમાં નામીચામી હસ્તીઓનો સમાવેશ થાય છે. આ ૮૪૬ મોટા પ્લોટો ખરીદનારાઓમાં કટોકટીના સમયે મિલકતો ભેગી કરનારા વર્તમાન અને ભૂતપૂર્વ IAS અધિકારીઓ, દિગ્ગજ રાજકારણીઓ, ઉદ્યોગપતિઓ અને જનપ્રતિનિધિઓ સામેલ છે. તપાસમાં બહાર આવ્યું છે કે અંસલ બિલ્ડર્સ અને કન્સોર્ટિયમ દ્વારા સરેરાશ ૧૯,૦૮૦ ચોરસ ફૂટના મોટા-મોટા પ્લોટો કાયદાકીય મંજૂરીઓ વગર આ પ્રભાવશાળી વ્યક્તિઓને વેચી દેવામાં આવ્યા હતા, જેનો ઉપયોગ મુખ્યત્વે આલીશાન ફાર્મહાઉસ અને બેનામી રોકાણ માટે થઈ રહ્યો હતો.

૧૨ ગામોની ૧૪૯ હેક્ટર જમીન તપાસના ઘેરામાં

લખનૌના ૧૨ ગામોમાં ફેલાયેલી કન્સોર્ટિયમની કુલ ૧૬૩.૧૮ હેક્ટર જમીનમાંથી આશરે ૧૪૯.૪૫ હેક્ટર જમીનના વેચાણ સામે ગંભીર સવાલો ઊભા થયા છે. બરૌના (૨૪૩ પ્લોટ), પહારનગર ટીકરિયા (૧૫૬ પ્લોટ), સોનેઈ કજેહરા (૧૩૧ પ્લોટ) અને હસનપુર ખેવલી જેવા વિસ્તારોમાં આ ગેરકાયદેસર પ્લોટિંગ કરવામાં આવ્યું હતું. હાઇ-ટેક ટાઉનશીપ નીતિ હેઠળ અનુસૂચિત જાતિ અને જનજાતિના જમીનમાલિકોની જમીન પ્રોજેક્ટમાં સમાવવામાં આવી હતી. આ જમીનમાલિકોને વળતર આપ્યા પછી પણ બિલ્ડરોએ તે જ જમીન કાગળોમાં હેરાફેરી કરીને બીજા લોકોને 'ડબલ સેલ' કરી દીધી હતી.

LDA કોર્ટમાં ધા નાખશે; ટ્રાન્ઝેક્શન સલાહકારની નિમણૂક

આ સમગ્ર મામલે કાનૂની શિકંજો કસવા માટે લખનૌ ડેવલપમેન્ટ ઓથોરિટી (LDA) ને સક્ષમ અદાલતમાં ગેરકાયદેસર ડીડ સામે કાનૂની દાવો દાખલ કરવા આદેશ અપાયો છે. આ ઉપરાંત, LDA હવે IRP અને NCLT સમક્ષ પોતાનો પક્ષ મજબૂત રીતે રજૂ કરશે. સમગ્ર પ્રોજેક્ટની સંપત્તિઓ અને જવાબદારીઓની આકારણી કરવા માટે એક પ્રોફેશનલ ટ્રાન્ઝેક્શન કન્સલ્ટન્ટની નિમણૂક કરવામાં આવી રહી છે. સરકારના આ બુલડોઝર જેવા કડક વલણથી ઉત્તરપ્રદેશના રિયલ એસ્ટેટ માફિયાઓ અને મિલકતો પચાવી પાડનારા અમલદારોમાં ભારે ફફડાટ વ્યાપી ગયો છે.