નવી દિલ્હી તા.૨૬ : તુર્કીના પ્રાચીન શહેર એફેસસમાં પુરાતત્વવિદોને એક અદ્ભુત શોધ થઈ છે. અહીં એક જૂના શૌચાલયનું ખોદકામ કરતી વખતે જમીનની નીચેથી 1,200 વર્ષ જૂની કબર મળી આવી છે.

પુરાતત્વવિદોને આ કબરમાંથી બે માનવ મૃતદેહના અવશેષ મળ્યા છે. પ્રાથમિક તપાસમાં જાણવા મળ્યું છે કે આ બંને જોડિયા બાળકોના અવશેષ છે. સૌથી ચોંકાવનારી વાત એ છે કે સંશોધકોનું માનવું છે કે આ બાળકો દુનિયામાં એક દિવસ પણ જીવ્યા નહોતા. એટલે કે તેમનું જન્મ સમયે જ મૃત્યુ થયું હતું.

આ કબર લગભગ 8મી સદીની હોવાનો અંદાજ છે. તે સમયે બાળકોને ઘરની નજીક કે ખાસ સ્થળે દફનાવવાની પ્રથા હતી.

એફેસસ વિશ્વના સૌથી જૂના અને મહત્વપૂર્ણ પુરાતત્વીય સ્થળોમાંનું એક છે. અહીંથી અગાઉ પણ અનેક ઐતિહાસિક વસ્તુઓ મળી છે. પરંતુ આ પ્રકારની બાળકોની કબર મળવી દુર્લભ છે.

સંશોધકોનું કહેવું છે કે આ શોધથી તે સમયની સામાજિક પરંપરાઓ, અંતિમ સંસ્કારની રીતિ અને આરોગ્ય વિશે ઘણી નવી માહિતી મળી શકે છે. હાલમાં અવશેષોને વધુ અભ્યાસ માટે લેબમાં મોકલવામાં આવ્યા છે.

આ શોધે સ્થાનિક અને આંતરરાષ્ટ્રીય સ્તરે લોકોનું ધ્યાન ખેંચ્યું છે.