નવી દિલ્હી : ભારતમાં ઓનલાઈન સટ્ટાબાજી અને ગેમિંગ સાથે જોડાયેલી ૧૨૯ વેબસાઇટ્સને બ્લોક કરવાના મામલામાં એક ચોંકાવનારું અને મોટું કૌભાંડ પ્રકાશમાં આવ્યું છે, જેમાં બે અદાલતોના નકલી આદેશોનો ઉપયોગ કરવામાં આવ્યો હોવાનું ખૂલ્યું છે.

પ્રાપ્ત વિગતો અનુસાર, દૂરસંચાર વિભાગ (DoT) ને રાજસ્થાન અને અલાહાબાદ હાઈ કોર્ટના નામે બે કથિત ન્યાયિક આદેશો ઈમેલ દ્વારા મોકલવામાં આવ્યા હતા, જેના આધારે અધિકારીઓએ ઇન્ટરનેટ સર્વિસ પ્રોવાઇડર્સને સૂચના આપીને કુલ ૧૨૯ ગેરકાયદેસર સટ્ટાની વેબસાઇટ્સ પર પ્રતિબંધ મૂક્યો હતો.

આ બનાવટી દસ્તાવેજોમાં અદાલતોની વાદળી મહોર, રાષ્ટ્રીય પ્રતિક અને ન્યાયાધીશોના નામનો દુરુપયોગ કરવામાં આવ્યો હતો, પરંતુ જ્યારે વિદેશી સમાચાર એજન્સી અને સબંધિત અદાલતો દ્વારા તેની ખરાઈ કરવામાં આવી ત્યારે આ સમગ્ર આદેશો નકલી હોવાનું સાબિત થયું હતું.

ઘટનાની ગંભીરતાને જોતાં અલાહાબાદ હાઈ કોર્ટની કચેરી દ્વારા ત્વરિત પગલાં લેવામાં આવ્યા હતા અને ગત ૬ નવેમ્બરના રોજ અજાણ્યા શખ્સો સામે બનાવટી દસ્તાવેજ તૈયાર કરવા તથા છેતરપિંડી આચરવા બદલ સત્તાવાર પોલીસ ફરિયાદ નોંધાવવામાં આવી હતી.

અગાઉ પણ સુપ્રીમ કોર્ટ દ્વારા અસ્તિત્વમાં ન હોય તેવા ટ્રિબ્યુનલના આદેશો રદ કરવાના કિસ્સા સામે આવી ચૂક્યા છે, ત્યારે આ તાજી ઘટનાએ સરકારી એજન્સીઓ દ્વારા ઓનલાઈન પ્લેટફોર્મ્સને બ્લોક કરવાની પ્રક્રિયા અને તેની સુરક્ષા સામે ગંભીર સવાલો ખડા કર્યા છે.

હાલમાં સાયબર ક્રાઇમ વિભાગ અને વરિષ્ઠ અધિકારીઓ દ્વારા આ કૌભાંડ પાછળ કોનો હાથ છે તથા તેમાં આર્ટિફિશિયલ ઇન્ટેલિજન્સ (AI) નો ઉપયોગ થયો છે કે કેમ તે અંગે ઊંડાણપૂર્વક તપાસ હાથ ધરવામાં આવી રહી છે.