સુરત, તા.૨૮: ઉત્તરાખંડમાં ચોમાસાના અંતિમ તબક્કામાં પહાડો પર સતત વરસી રહેલા આફતના વરસાદે મુસાફરો અને શ્રદ્ધાળુઓની ચિંતા વધારી દીધી છે. કેદારનાથ ધામમાં છેલ્લા ૨૪ કલાકથી પડી રહેલા મુશળધાર વરસાદ અને ખરાબ હવામાનના કારણે સુરતના ૧૪ શ્રદ્ધાળુઓનું એક જૂથ ત્યાં જ ફસાઈ ગયું છે. કુદરતી આફત વચ્ચે અટવાયેલા આ શ્રદ્ધાળુઓએ સોશિયલ મીડિયાના માધ્યમથી વીડિયો જારી કરીને ગુજરાત સરકાર પાસે તાત્કાલિક મદદ અને રેસ્ક્યૂ માટે કાકલૂદી કરી છે.

મળતી વિગતો અનુસાર, સુરતના અલથાણ વિસ્તારના નિવાસી રંજનબેન પંચાલે કેદારનાથથી એક ભાવુક વીડિયો બનાવીને સોશિયલ મીડિયા પર શેર કર્યો હતો. જેમાં તેમણે વિનંતી કરતા જણાવ્યું હતું કે, "અમે કેદારનાથ દર્શન માટે આવ્યા છીએ અને અહીં સતત પડી રહેલા વરસાદને કારણે ફસાઈ ગયા છીએ. ગુજરાત સરકારને અમારી નમ્ર અપીલ છે કે અમારા સમગ્ર ગ્રુપને સલામત રીતે અહીંથી બહાર કાઢવામાં મદદ કરે." જોકે, રાહતની વાત એ છે કે આ ગ્રુપમાંથી ૩ સભ્યોનું હેલિકોપ્ટર મારફતે સફળતાપૂર્વક રેસ્ક્યૂ કરી લેવાયું છે, પરંતુ હજુ પણ ૧૧ શ્રદ્ધાળુઓ ત્યાં જ અટવાયેલા છે.

બીજી તરફ, ઉત્તરાખંડમાં શુક્રવાર રાતથી શરૂ થયેલા સતત વરસાદના પગલે કુમાઉં વિસ્તાર સહિત સમગ્ર રાજ્યમાં જનજીવન ભારે પ્રભાવિત થયું છે. વાતાવરણની ગંભીરતાને ધ્યાનમાં રાખીને પ્રશાસન દ્વારા ચારધામ યાત્રા સામયિક રીતે સ્થગિત કરી દેવામાં આવી છે.

હવામાન વિભાગે પણ પરિસ્થિતિને ધ્યાનમાં રાખીને દેહરાદૂન, ટિહરી અને પૌરી જિલ્લાઓ માટે 'રેડ એલર્ટ' જાહેર કર્યું છે, જ્યાં અત્યંત ભારે વરસાદની ચેતવણી આપવામાં આવી છે. જ્યારે રાજ્યના અન્ય જિલ્લાઓમાં 'ઓરેન્જ એલર્ટ' આપવામાં આવ્યું છે. ગુજરાત સરકાર અને સ્થાનિક તંત્ર ફસાયેલા તમામ શ્રદ્ધાળુઓનો સંપર્ક કરીને તેમને સુરક્ષિત સ્થળે ખસેડવા માટે ઉત્તરાખંડ પ્રશાસનના સતત સંપર્કમાં છે.