નવી દિલ્હી, તા.૨૩: દેશની રાજધાની દિલ્હીમાં જંતર-મંતર ખાતે ચાલી રહેલું આંદોલન હવે વધુ વેગ પકડી રહ્યું છે. પ્રદર્શનકારીઓને રોકવા માટે પ્રશાસન દ્વારા નજીકના ૧૭ જેટલા મુખ્ય મેટ્રો સ્ટેશનો બંધ કરી દેવામાં આવ્યા છે અને સમગ્ર વિસ્તારમાં ઇન્ટરનેટ સેવાઓ પર પણ પ્રતિબંધ લાદવામાં આવ્યો છે. આમ છતાં, જંતર-મંતર પર વિરોધ દર્શાવવા આવતા લોકોનો પ્રવાહ અટકવાનું નામ નથી લઈ રહ્યો. કડક સુરક્ષા અને અવરોધો હોવા છતાં આંદોલનકારીઓ કિલોમીટરો સુધી પગપાળા ચાલીને વિરોધ સ્થળે પહોંચી રહ્યા છે.
બૉલીવુડ અભિનેત્રી હુમા કુરેશી અને ખેડૂત સંગઠનોનું સમર્થન
ગુરુવારે વહેલી સવારે જંતર-મંતર પર ભીડ પ્રમાણમાં ઓછી દેખાતી હતી, પરંતુ દિવસ વધવાની સાથે જ માહોલ ગરમાયો હતો. જાણીતી બૉલીવુડ અભિનેત્રી હુમા કુરેશી પોતાના સહયોગીઓ સાથે વહેલી સવારે આંદોલન સ્થળે પહોંચી હતી અને પ્રદર્શનકારીઓ સાથે ઊભી રહીને પોતાનું સમર્થન વ્યક્ત કર્યું હતું. તેમના આગમનથી પ્રદર્શનકારીઓમાં નવો ઉત્સાહ જોવા મળ્યો હતો.
આ ઉપરાંત, "ભારતી કિસાન સંઘ"ની લીલી ટોપીઓ પહેરેલા ખેડૂતોનું એક મોટું જૂથ પણ જંતર-મંતર ખાતે આવી પહોંચ્યું છે. આંદોલનમાં મોટી સંખ્યામાં યુવતીઓ અને વિદ્યાર્થીઓ પણ જોડાયા છે, જેના કારણે સતત સૂત્રોચ્ચાર અને દેશભક્તિના નારાઓથી સમગ્ર વિસ્તાર ગૂંજી રહ્યો છે.
કયા ૧૭ મેટ્રો સ્ટેશનો બંધ કરાયા?
પ્રદર્શનકારીઓના જમાવડાને રોકવા માટે દિલ્હી મેટ્રો દ્વારા સેન્ટ્રલ દિલ્હીના અત્યંત મહત્વપૂર્ણ એવા ૧૭ સ્ટેશનો બંધ કરવામાં આવ્યા છે:
•    રાજીવ ચોક, પટેલ ચોક, જનપથ, મંડી હાઉસ, કેન્દ્રીય સચિવાલય
•    લોક કલ્યાણ માર્ગ, રામકૃષ્ણ આશ્રમ માર્ગ, બારખંભા રોડ, સુપ્રીમ કોર્ટ, સેવા તીર્થ
•    ITO, દિલ્હી ગેટ, ઇન્દ્રપ્રસ્થ, ખાન માર્કેટ, જોર બાગ, શિવાજી સ્ટેડિયમ અને ઝાંડેવાલન.
મેટ્રો સ્ટેશનો બંધ થવાના કારણે આસપાસના વિસ્તારોમાં ભારે ટ્રાફિક જામની સમસ્યા સર્જાઈ છે. લોકો દૂરના સ્ટેશનો પર ઊતરીને જંતર-મંતર સુધી પહોંચવા માટે પગપાળા જઈ રહ્યા છે.
ચુસ્ત સુરક્ષા છતાં શાંતિપૂર્ણ વિરોધ
જંતર-મંતર, જનપથ અને સંસદ માર્ગ તરફ જતા તમામ રસ્તાઓ પર દિલ્હી પોલીસ અને સુરક્ષા દળોનો ચુસ્ત બંદોબસ્ત ગોઠવી દેવામાં આવ્યો છે. સવારથી જ પરિસ્થિતિ શાંતિપૂર્ણ પરંતુ તણાવપૂર્ણ રહી છે. પ્રદર્શનકારીઓ શાંતિપૂર્ણ રીતે નિયુક્ત સીમાઓમાં રહીને જ વિરોધ પ્રદર્શન અને સૂત્રોચ્ચાર કરી રહ્યા છે, જ્યારે પોલીસ સમગ્ર પરિસ્થિતિ પર સતત ડ્રોન અને સીસીટીવી દ્વારા નજર રાખી રહી છે.