કેલિફોર્નિયા તા.૨૪: ઉત્તરી કેલિફોર્નિયાની એક લાઈબ્રેરીમાં સોમવાર સાંજે થયેલા અંધાધૂંધ ગોળીબારમાં બે લોકોના મોત થયા છે અને એક બાળકી ઘાયલ થઈ છે. ચીકો પોલીસ વિભાગના જણાવ્‍યા અનુસાર, આ મામલે ૧૮ વર્ષના એક શંકાસ્‍પદ યુવકની ધરપકડ કરવામાં આવી છે.

આ ઘટના સોમવાર સાંજે આશરે ૫ વાગ્‍યે કેલિફોર્નિયાના ચીકોમાં આવેલી બ્‍યૂટ કાઉન્‍ટી લાઈબ્રેરીમાં બની હતી. ચીકો પોલીસ વડા બિલી એલ્‍ડ્રિજે જણાવ્‍યું કે, જ્‍યારે હુમલાખોર લાઈબ્રેરીના પાછળના દરવાજાથી ભાગવાનો પ્રયાસ કરી રહ્યો હતો, ત્‍યારે જ પોલીસે તેને ઝડપી લીધો હતો.

પોલીસે શંકાસ્‍પદ વ્‍યક્‍તિની ઓળખ ૧૮ વર્ષના બ્રેડલી સ્‍કોટ સાયર તરીકે કરી છે. તેના પર હત્‍યાના બે ગુના નોંધીને તેને બ્‍યૂટ કાઉન્‍ટી જેલમાં રાખવામાં આવ્‍યો છે. અધિકારીઓએ જણાવ્‍યું કે, હુમલાખોર અમેરિકાના કુખ્‍યાત 'કોલંબાઇન સ્‍કૂલ નરસંહાર જેવી સામૂહિક હત્‍યા (મોટા પાયે નરસંહાર) કરવા માંગતો હતો.

તે લાઈબ્રેરીમાં આવેલા કોઈપણ ભોગ બનનાર વ્‍યક્‍તિને પહેલાથી ઓળખતો ન હતો. તપાસમાં બહાર આવ્‍યું છે કે તેણે કોલંબાઇનના હત્‍યારા એરિક હેરિસ જેવા જ કપડાં પહેર્યા હતા. પોલીસનું માનવું છે કે તે ઈન્‍ટરનેટ પર સામૂહિક હત્‍યારાઓને પસંદ કરતા એક ગ્રુપ (જૂથ) સાથે જોડાયેલો હતો અને તેણે આ સનકમાં એકલાએ જ આ ઘટનાને અંજામ આપ્‍યો હતો.

પોલીસના જણાવ્‍યા અનુસાર, હુમલાખોરે આશરે ૮ રાઉન્‍ડ ગોળીબાર કર્યો હતો. એક વ્‍યક્‍તિને લાઈબ્રેરીના મુખ્‍ય દરવાજા પર અને બીજા વ્‍યક્‍તિને ઈમારતના પાછળના ભાગમાં ગોળી મારવામાં આવી હતી. આ ગોળીબારની ઘટનામાં ૭૪ વર્ષના રોબર્ટ જોહ્‍ન્‍સનનું ઘટનાસ્‍થળે જ મોત નીપજ્‍યું હતું. આ સિવાય ૪૬ વર્ષના કોડી હલ, જેઓ પોતાના મિત્રની દીકરીને લાઈબ્રેરી ફેરવવા લઈ ગયા હતા, તેમને હોસ્‍પિટલ લઈ જવામાં આવ્‍યા ત્‍યારે મૃત જાહેર કરવામાં આવ્‍યા હતા.

મળેલી માહિતી અનુસાર, કોડી હલ સાથે આવેલી નાની બાળકી કાચના ટુકડા વાગવાને કારણે સામાન્‍ય રીતે ઘાયલ થઈ હતી, જેને સારવાર બાદ હોસ્‍પિટલમાંથી રજા આપી દેવામાં આવી છે.